Syr eliniń syıy

Eń aldymen «Baıqońyr» ǵarysh aılaǵy men Qorqyt ata zııarat etý kesheni EKSPO-2017 kórmesiniń bir nysany retinde kartaǵa engenin aıtqanymyz abzal. Bul degenińiz, kórmege kelgen týrıster ǵaryshtyń adamǵa qalaı baǵynǵanyn kózben kórip, túbi bir túrkige ortaq tulǵa – Qorqyt atanyń basyna zııarat etýge birden-bir múmkindik bolmaq. Osy rette Qorqyt ata kesheninen etnoaýyl boı kóterip, ulttyq qolóner buıymdary kópshilik nazaryna usynylady. Sondaı-aq, sporttyq-mádenı sharalar da uıymdastyrylady. Týrıstik operatorlardyń málimetinshe, jer kindigi Baıqońyrǵa Germanııa, Ulybrıtanııa jáne Qytaıdan kelýge nıetti týrıster kóp. Osyǵan oraı juldyzdy qalashyqty kórmekke kelgen saıahatshylardyń ótinishterin qaraý merzimi 45 kúnnen 10 kúnge qysqardy. Oblystyq kásipkerlik jáne týrızm basqarmasynyń basshysy Nurjan О́mirserikulynyń aıtýynsha, kórmege Syr elinen 75 myń adam qatysady degen boljam bar. Oblystan kórmege temir jol kóligimen 50 myń adam, áýe kóligimen 10 myń adam jáne avtobýspen 15 myń adam jetkiziletin bolady. Kórme kezinde Qyzylorda-Kókshetaý poıyzyna qosymsha 36 vagon jalǵanady. Bul jolaýshylardyń barys-kelisin jaqsartý úshin jasalatyn qadam. Sonymen qatar, shara barysynda Qyzylorda qalasynan Astana baǵytyna 3 jolaýshy poıyzy uıymdastyrylǵan. Kúndelikti «Qyzylorda – Kókshetaý» poıyzy, jup kúnderi «Qyzylorda – Pet­ropavl» jáne taq kúnderi «Qy­zylorda – Astana» poıyzdary jú­redi. EKSPO-2017 kórmesi kezinde Qyzylorda oblysynan bólingen kvota kúnine 536 oryndy quraıdy. 
Sondaı-aq, tamyzdyń 10-14-i kúnderi Astanada Qyzyl­orda oblysynyń óneri jáne mádenıeti kúnderi ótýde. Ob­lystyq mádenıet, arhıvter jáne qujattama basqarmasy basshysynyń orynbasary Janat Quramysova  osy kúnderi N.Bekeja­nov atyndaǵy qazaq mýzykalyq drama teatry ujymy elordalyqtarǵa Iran Ǵaıyp­tyń «Qorqyt» spektakli men ózge de qoıy­lym­daryn usynatynyn aıtady. Baǵdarlamaǵa sáıkes, óner ujymdarynyń konserti, kol­óner buıymdarynyń kórmesi de ótedi. EKS­PO-2017 resýrstyq ortaly­ǵynyń dı­rek­tory Jandos Tusma­ǵambetovtyń aıtýynsha, qyzylor­dalyqtar kórmede 6 jobany ta­­nys­tyrady. Qysqasy, qyzylor­dalyqtar ha­lyq­aralyq kórmeniń máni men mańyzyn arttyrýǵa jan-jaqty daıyndyqpen kelip otyr.

Erjan BAITILES,
«Egemen Qazaqstan»

Qyzylorda oblysy