Qazaq dalasy Pýshkınniń esimin eki ǵasyr buryn estigen. Uly Abaı onyń «Evgenıı Onegın» romanyn yqshamdap aýdarǵanyn, qyrdyń adamdary Tatıananyń jan sezimine ortaqtasyp, sonshalyqty yqylaspen qabyldaǵanyn Muhtar Áýezov «Abaı jolynda» tamyljytyp jazǵan. Osy aýdarmadan soń qazaq arasynda Tátish esimdi qyzdyń aty paıda boldy. Tatıanańyz solaı erkelete aıtylatyn Tátishke aınalyp júre berdi...
Orystyń uly aqynynyń atyndaǵy zaldyń ashylý saltanatynda sóz sóılegen Parlament Májilisiniń depýtaty, pýshkıntanýǵa ózindik úles qosqan ǵalym Saýytbek Abdrahmanov: «Bul jerde Pýshkınniń paıda bolýyna deıin Reseıde orys tili qarapaıym buqaranyń tiline aınala jazdaǵanyn aıtý artyqtyq etpeıdi. Elıta atanǵan aqsúıekter negizinen fransýz tilinde sóıleýdi durys kóretin, – dedi. – Orys tili adam oıy men seziminiń tereń qaltarystaryn ashyp kórsete almaıdy degen túsinikti buzǵan adam – Pýshkın. Orys halqynyń óz eline degen senimin qalyptastyrǵan da naq Pýshkınniń ózi. Bul – úlken eńbek, úlken erlik».
Osyndaı uly tulǵanyń atynda zaldyń ashylýy Qazaqstan men Reseıdiń birlesken is-qımyl josparyna saı júzege asty.
Zalǵa Ulttyq akademııalyq kitaphana qorynan 500-den astam kitap usynylǵanyn mekeme dırektory Úmithan Muńalbaeva baıandady. Kitaptar negizinen aqynnyń ár jyldary jaryq kórgen óz eńbekteri men ol týraly zertteýler, maqalalardan turady. Odan basqa tanymal sýretshi Orest Kıprenskııdiń «Aleksandr Pýshkın» portreti men aqyn qoljazbalarynyń kóshirmeleri qoıylǵan.
Saltanatty sharaǵa elimizdegi Reseı Federasııasy elshiligi atynan Reseı ǵylymy men mádenıeti ortalyǵynyń jetekshisi Vladımır Nefedov, tanymal pýblısıst Ǵadilbek Shalahmetov, basqa da zııaly qaýym ókilderi qatysyp, júrekjardy lebizderin bildirdi.
Aıgúl SEIILOVA,
«Egemen Qazaqstan»
