«Fransııa pavılony tek qana ozyq tehnologııalar men zamanaýı ınnovasııalardyń ǵana ortalyǵy emes, sonymen birge, ol álemdik mádenıettiń de únqatysý alańy bolyp tabylady. Mine, sonyń aıshyqty dálelindeı, búgin bizdiń ortamyzǵa planetamyzdyń tanymal tulǵasy Oljas Súleımenov myrza kelip otyr. Siz, qadirli Oljas Omaruly, dúnıe júziniń oqyrmandaryn uıytqan 16 kitap jazdyńyz. Sizdiń 1975 jyly jaryq kórgen «Az ı Iа» kitabyńyz Sizdi álemge tanytty, álem oqyrmandaryn qazaq aqynynyń ulylyǵyna tánti etti. Qadirli Súleımenov myrza, Siz «Nevada Semeı» qozǵalysyn ómirge ákelip, ıadrolyq synaq alańdarynyń jabylýyna sebepker boldyńyz. Biz Sizdiń Fransııa pavılonyna kelýińizdi zor qýanyshpen qabyldadyq. Bul bizdiń elimizge degen Sizdiń tarapyńyzdan jasalǵan úlken qurmet dep bilemiz. IýNESKO-nyń elshisi retinde Siz bizdiń planetamyzdyń bolashaǵyn qalaı boljaısyz?» – dedi kezdesýdi ashqan Fransııa pavılonynyń Bas komıssary Paskal Loro quttyqtaý sózinde.
Jınalǵan jurttyń dý qol shapalaqtaýymen sóz kezegi Oljas Súleımenovke berildi. «Táýelsiz Qazaqstannyń elordasynda ótip jatqan EKSPO-2017 halyqaralyq kórmesinde álemniń 115 memleketiniń pavılony bar eken. Solaı bola tursa da EKSPO kórmesimen tanysý saparymdy men Fransııa Respýblıkasynyń pavılonynan bastadym. Oǵan meniń uzaq jyldar boıy Fransııada turyp, eńbek etkendigim ǵana sebep bolǵan joq, men ejelgi Fransııaǵa, bul eldiń mádenıeti men ádebıetine balalyq shaǵymnan jaqyn bolyp óstim. Sondyqtan kórmedegi osy eldiń pavılonyna kelýdi ózime paryz sanadym», dedi óz sózinde Oljas Súleımenov.
Odan ári aqyn Parıjde eńbek etken kúnderdegi esteligimen bólisip, adamzattyń aldynda turǵan keleli problemalardy da tilge tıek etti. «Qazaqstanda ótip jatqan EKSPO kórmesiniń bas taqyryby – «Bolashaqtyń energııasy». Búginde adamzatty balamaly qýat kózderin ıgerý problemasy erekshe tolǵandyryp otyr. Birqatar elder, onyń ishinde Fransııa kún energııasyn ıgerýdi bastap otyr. Adamzat kún energııasyn tolyq ıgergen kezde bizge basqa energııa kózi qajet bolmaýy múmkin. Kún – bul sarqylmas energııa. Kún energııasy adam balasyna tolyqtaı qyzmet etken kezeńnen bastap kómir, gaz jáne atom arqyly alynatyn energııaǵa degen suranys ózinen ózi joıylady. О́kinishke qaraı, búginde Fransııa atom elektr stansalary energııasyn eń kóp tutynatyn el bolyp otyr. Biz, «Nevada-Semeı» qozǵalysy Qazaqstanda atom energııa stansasyn salýǵa qarsy bolyp kelemiz. Árıne, atom energııasy – eń arzan energııa kózi. Onyń ústine Qazaqstan ýran óndirýde álemde kóshbasshy bolyp tabylady. Biraq urpaq bolashaǵy úshin atom elektr stansasyn salý qaýipti. Mine, sondyqtan da Qazaqstan «Bolashaqtyń energııasy» atty taqyrypta kórme ótkizip, adamzatty tolǵandyratyn kókeıkesti máseleni kún tártibine shyǵaryp otyr. Bul Qazaqstannyń qanshalyqty órkenıet bıigine kóterilgenin kórsetedi. EKSPO-2017 halyqaralyq kórmesi balama qýat kózderin ashýda tek Qazaqstan úshin ǵana emes, búkil adamzat úshin ıgi jetistikter ákeledi dep senemin», – dedi aqyn sóz túıininde. Odan ári jınalǵan jurt Oljas Súleımenovke kóptegen suraqtar qoıdy. Aqyn jurttyń suraǵyna jan-jaqty jaýap qaıtaryp, Ortalyq Azııa, tipti, TMD memleketteriniń ishinde Qazaqstanda alǵash ret ótkizilip otyrǵan Búkilálemdik kórmege sáttilik tiledi.
О́z kezeginde EKSPO-2017 halyqaralyq mamandandyrylǵan kórmesindegi Fransııa Komıssarıatynyń syrtqy kommýnıkasııalar dırektory Malgojata Týard aqynǵa salıqaly kezdesý ótkizgeni úshin shynaıy alǵysyn jetkizip, onyń belsendi áleýmettik jáne gýmanıtarlyq qyzmetine úlken tabys tiledi.
