Elimizdegi eń tanymal, eń úzdik jaıdarmanshylardyń basyn qosqan keshte eki top óner kórsetti. «Aǵalar» jáne «Iniler» dep shartty túrde ataýǵa ıe bolǵan toptardyń birinde – ardager jaıdarmanshylar bas qossa, ekinshisi topta qazirgi kezde Joǵary lıgada óner kórsetip júrgenderden, barlyǵy jıyrmaǵa jýyq toptyń ókilderi sahnaǵa shyqty.
Oıyn jeńil, erkin túrde ótti deýge bolady. Jaıdarmanshylar túrli taqyryptardy qamtýǵa tyrysqan eken. Jastardyń máselesinen bastap, álemdik oqıǵalar da, tipti qazir ótip jatqan EKSPO kórmesi de jıi ázilge iligip otyrdy.
Jyl boıy birinshilikte óner kórsetip, sahnada júrgen «Iniler» quramasy babynda eken. Ásirese, «Sálemdesý» jáne «Kóriniste» jaqsy kórine bildi. «Úzdik oıynshyǵa» beriletin kýbok ta osy quramdaǵy syrdarııalyq Marat Sársenbaevqa berilgen bolatyn.
Al sahnadan alystańqyrap ketken ardagerlerdiń daıyndyǵy az ekeni kózge kórinip qaldy. Álde, jatyrqap qaldy ma, kim bilsin?! Biraq tájirıbeli jigitter osaldyq tanytqan joq. Oıyn sońynda qazylar alqasynyń sheshimimen eki toptyń upaıy teń bolyp shyǵýy da, sony kórsetkendeı. Úlkendi syılaıtyn dástúr boıynsha, úlken kýbok «Aǵalar» komandasyna tabys etildi.
Qazylar alqasy demekshi, jaıdarmanshylardyń ónerin baǵalaǵandardyń ózderi de atynan at úrikkendeı. Oıyn bastalarda barsha jaıdarmanshylarǵa sáttilik tilep, «Jaıdarmannyń» mańyzdylyǵyn tilge tıek etken Din isteri jáne azamattyq qoǵam mınıstri Nurlan Ermekbaev myrza qazylar alqasynyń quramyna qosyldy. Sondaı-aq, Parlament Májilisiniń depýtaty Baqtııar Máken, telejúrgizýshi Berik Ýálı, qoǵam qaıratkeri Murat Ábenov, teatr jáne kıno akteri Ádil Ahmetov oıynǵa qazylyq etti.
Bir múshel boıy jastardyń qyzyǵýshylyǵyna bólenip, telearnaǵa shyqqan soń da, reıtıngtiń tórinde turǵan «Jaıdarman» oıyny endigi halyqtyq jobaǵa aınalyp úlgerdi. Bul jerde tek qana ázil-saıys, qýaqy qaljyń emes, jastarmen baılanystyratyn, olardyń muqtajdyǵy men óresin anyqtaıtyn alań dep qarastyratyn sát kelgen sekildi. Dál qazirgi sátte otyz myńnan astam jas pen jasóspirim jaıdarman oınap júr. Bul – úlken kúsh. Nebári 13 jyldyń ishinde osynsha kúshke ıe bolǵan «Jaıdarmannyń» alar bıigi men asýy alda.
Endeshe, bar janardy jaýlaǵan «Jaıdarmannyń» týǵan kúni qutty bolsyn!
Raýan QAIDAR,
«Egemen Qazaqstan»
