«Qylmystyq quqyqbuzýshylyqtardyń túrlerine saraptama jasasaq, aýyr qylmystar 22,4 paıyzǵa , densaýlyqqa ortasha zııan keltirý 54,2 paıyzǵa, urlyq 18,7 paıyzǵa , tonaý 16,5 paıyzǵa , qaraqshylyq 45,5 paıyzǵa, buzaqylyq qylmystary 38,9 paıyzǵa tómendegen. Ahýaldyń birshama saýyǵýyna departamenttiń salalyq qyzmetteri, basqa da quqyq qorǵaý organdary jáne múddeli mekemelermen birlese otyryp ótkizilgen «Quqyq tártibi», «Qadaǵalaý», «Núktelik», «Ýchaske» keń-kólemdi jedel aldyn-alý sharalary da oń áser etti»,-dedi Ábdiǵanı Taıjanuly
Onyń aıtýynsha, tirkelgen qylmystardyń negizgi bóligin ıaǵnı al 64,6 paıyzyn urlyq qylmystary qurap otyr. Júrgizilgen saraptama negizinde, qoǵamdyq orynda jasalǵan qylmystardyń 0,3 paıyzy adam óltirý, 0,2 paıyzy densaýlyqqa aýyr dene jaraqatyn salý, 7 paıyzy tonaý, 0,1 paıyzy qaraqshylyq, 11,9 paıyzy buzaqylyq, 15,6 paıyzyn basqa da qylmystar quraǵan. Sannan sapaǵa kóshýdi eskertken oblys ákimi sala basshylaryna qylmyspen kúresýde sheteldik ozyq úlgilerdi engizip, utymdy tájirıbelerdi paıdalanýǵa keńes berdi.
«Qylmysty azaıtýdyń utymdy joly - jumyssyzdyqty joıý. Jasyratyny joq, quqyq qorǵaý oryndary negizinen paıyzdyq kórsetkishterdi tómendetýge kúsh salady. Alaıda bul áreket máseleni sheshpeıdi. Paıyzdyq kórsetkishter tómendegenimen qylmys azaıyp otyrǵan joq. Sondyqtan jergilikti polısııa jumysty júıeli ári tııanaqty atqarýy tıis. Qylmyspen kúres jumystaryna qoǵamdyq belsendi toptar men jastar uıymdaryn tartý qajet», - dedi Janseıit Túımebaev.
Komıssııa otyrysynda qylmyspen kúresti kúsheıtý, quqyq buzýshylyqtyń aldyn alý jáne qoǵamdyq qaýipsizdikti qamtamasyz etý maqsatynda atqarylatyn sharalar barysy talqylandy. Nátıjesinde sala basshylaryna oblys basshysy tarapynan tıisti nusqaý, tapsyrmalar berildi.
Jıynda sondaı-aq oblystaǵy respýblıkalyq jáne oblystyq mańyzy bar avtojoldardyń jaǵdaıy, jaıaý júrginshiler ótkelderin salý, jol-kólik oqıǵalarynyń aldyn alý, apattylyqty azaıtý máseleleri talqylanyp, naqty sharalar qabyldaý júkteldi.
