Onyń quramynda oblystaǵy belgili ǵalymdar, stýdentter, ólketanýshylar bar. Segiz adam Qostanaı qalasynan attanady, qalǵany Amankeldi, Jankeldi aýdandarynan qosylady, barlyǵy 20 adamdy quraıdy. «Nur shańyraq» qoǵamdyq qory qoldaıtyn ekspedısııany fılologııa ǵylymdarynyń doktory Almas Ábsadyq basqarady. Ekspedısııa músheleri attanar aldynda buqaralyq baspasóz quraldary ókilderi úshin brıfıng ótkizdi.
«Ekspedısııa maqsaty–Keıki batyr týraly el aýzynda qalǵan, áli de belgisiz, biz bilmeımiz-aý degen áńgimelerdi, aqparattardy jınaý bolyp tabylady. El táýelsizdigi úshin ótken ǵasyrda bolǵan iri oqıǵalardyń bel ortasynda bolǵan halyq batyry týraly el arasynda aıtylatyn áńgimeler áli de bar dep oılaımyz. Batyrdyń bas súıegi elge aldyrylyp, onyń bet álpeti qalpyna keltirilip, kúzde týǵan jer qoınyna tapsyrylaıyn dep jatqanda, týǵan jerinde qol qýsyryp otyrǵanymyz jaraspas degen pátýamen osylaı jolǵa shyǵýǵa bel býdyq» dedi Almas Ábsadyq.
«Keıki dala batyrlarynyń biri ǵana emes, dalanyń sońǵy kókjalynyń da biri, taǵdyry da, ólimi de óte jumbaq tulǵa. Ol týraly qansha aıtsaq ta, jazsaq ta, izdestirsek te artyq emes. Al ekspedısııa maqsaty–jas urpaqtyń elge, jerge degen patrıottyq sezimin oıatý, tárbıeleý» dedi ekspedısııa múshesiniń biri fılosofııa ǵylymdarynyń kandıdaty, professor Qalqaman Jaqyp.
Ekspedısııa quramyna kirgen Aqmaral Eralına ótken jyly 100 jyldyǵy toılanǵan Ult azattyq kóterilisin zerttegen tarıhshynyń, Torǵaı týmasynyń biri. Ol jýrnalısterge ekspedısııa Keıki qatysqan qaqtyǵystar bolǵan oryndardyń barlyǵyna baratyndyǵyn aıtty.
«Táýelsizdik, erkindik rýhy Torǵaıdan bastaldy, onda kóp qan tógildi. Búginde Torǵaı jerinde atalar súıegi qalǵan jerdiń barlyǵy da qasıetti oryndar dep atalýy tıis. Ekspedısııa sol oryndardyń barlyǵyn taǵy da aralaıdy, jergilikti turǵyndarmen kezdesýler ótkizedi, mýzeılerdi aralaıdy. Ekspedısııa jumysy rýhanı, sanany jańǵyrtý jumystaryna úles bolyp qosylady» dedi Aqmaral.
12 shildede attanǵan ekspedısııa 17 shildede qaıtyp oralady. Oblystyq ishki saıasat basqarmasynyń «Uly dala tulǵalary» atty jobasynyń quramyna kiretin ekspedısııa jumysynyń qorytyndysy boıynsha derekti fılm túsirilip, fotoalbom jasalady. Kúzde Keıki batyr súıegin jerleýdi rásimdeý aıasynda ótetin konferensııada onyń tusaýkeseri kópshilik nazaryna usynylmaq.
Názıra JÁRIMBETOVA,
«Egemen Qazaqstan»
