OSK tóraǵasy Berik Imashev jetekshilik etken jıynda Ortalyq saılaý komıssııasy aldymen «Qazaqstan Respýblıkasy Prezıdentiniń Jarlyǵymen taǵaıyndalǵan Qazaqstan Respýblıkasy Parlamenti Senatynyń depýtattaryn tirkeý týraly» qaýly qabyldady. Al qatysýshylar nazaryna qaýlynyń tolyq jobasyn Ortalyq saılaý komıssııasynyń hatshysy Baqyt Meldeshov tanystyrdy.
«Qazaqstan Respýblıkasynyń Parlamenti jáne onyń depýtattarynyń mártebesi týraly» Konstıtýsııalyq zańǵa sáıkes, tirkeýden soń depýtattar óz qyzmetine kirisetin bolady. Sondyqtan da biz búgin Elbasy Jarlyqtarymen taǵaıyndalyp, tirkeýden ótken Senat depýtattaryna tıisti kýálik pen omyraýǵa taǵatyn belgilerin resmı túrde tapsyrýdamyz», dedi Berik Imashev.
Sodan keıin OSK tóraǵasy Parlament Senaty depýtattarynyń kýálikteri men omyraýǵa taǵatyn belgilerin tirkelgen depýtat – Sáýle Muhanbedıanqyzy Aıtpaeva men Vladımır Vasılevıch Volkovqa jáne Talǵat Amangeldiuly Musabaevqa arnaıy quttyqtap, qyzmettik kýálikterin tabys etti.
Aıta keteıik, 2017 jylǵy 28 maýsymda elimizde Qazaqstan Respýblıkasy Parlamenti Senatynyń depýtattaryn saılaý ótip, barlyq óńirlerden jáne Astana, Almaty qalalarynan 16 depýtat saılanǵan bolatyn.
Nurlybek DOSYBAI,
«Egemen Qazaqstan»
