Jerlesterimiz match bastala sala oıyn tizginin óz qoldaryna aldy. Alǵashqy mınýttarda-aq latvııalyqtardyń qaqpasyna birneshe joıqyn soqqy darytyp úlgerdi. Kezekti aıyp dobynda Djýnıor Kabananganyń da esep ashatyn múmkindigi bolyp edi. Biraq "Spartaks" qaqpashysy óz ornynan tabyla bildi.
О́z kezeginde qonaqtar da qarap qalmady. Degenmen ara-tura qarymta shabýylǵa shyqqanmen, Iýrıı Logvınenko bastaǵan qorǵaýshylar osaldyq tanyta qoımady.
Kezdesýdiń ekinshi bóligi de osy qarqynmen jalǵasty. Elordalyq ujym birinshi bolyp gol soǵýǵa umtyldy. Alǵashqy eki mınýtta-aq qonaqtar qaqpasyna eki qaýipti soqqy baǵyttaldy. Bul joly da alań ıelerine sáttilik joldas bolmady.
Degenmen, 58-mınýtta Patrık Tvýması sheberliginiń arqasynda eki-úsh qarsylasynyń arasynan alys buryshty dál kózdep, alǵashqy goldy saldy.
Osy goldan keıin es jıyp, alǵa umtylǵan Marek Zýb shákirtteri aqyryndap oıyn tizginin óz qoldaryna ala bastady. Dopqa da kóbirek ıelik etti. Nátıjesinde, 72-mınýtta Edgard Vardanıan Aleksandr Mokın qaqpasyn dál kózdep, tarazy basyn teńestirdi.
Kezdesýdiń 80-mınýtynda "Astana" sapynan Roman Murtazaevtyń gol salatyn yńǵaıy kelip edi, biraq oraıy kelgen tusty utymdy paıdalana almady. Araǵa bes mınýt salyp Djýnıor Kabananga qaqpa mańyndaǵy talas kezinde dál soqqy jasap qaqpa toryn týlatqan. Alaıda, qaptal tóreshisi jalaýshasyn kóterip, offsaıdty tirkegenin bildirdi.
Qalǵan ýaqytta osy esep tirkelip, "Astana" kelesi kezeńge joldama aldy.
