Elimiz osy ýaqytqa deıin jemqorlyq deńgeıin tómendetý baǵytynda eleýli qadamdar jasady. Álemdik dertke aınalǵan jemqorlyqpen kúresti odan ári jandandyrý isin Elbasynyń taǵy bir pysyqtaýy beker emes. Sebebi, qoǵamdyq qaýipsizdikti qamtamasyz etý, densaýlyq saqtaý, bilim berý, turǵyn úı-kommýnaldyq sharýashylyǵy ispetti kúndelikti ómirimizge baılanysty salalardaǵy jemqorlyq asa qaýipti. Bul salalardaǵy jemqorlyq deńgeıiniń joǵary bolýy óz kezeginde memlekettik organdarǵa degen senimdi tómendetedi.
«Qazaqstannyń Úshinshi jańǵyrýy: jahandyq básekege qabilettilik» atty Joldaýda ekonomıkalyq qylmystardy izgilendirý, aıyppuldar mólsheri men merzimin qısynǵa saı retteý, kásipkerlerdi qoldaý, t.b. máseleler kóterildi. Sonymen birge, jeke menshikti qorǵaýǵa, quqyq ústemdigine jáne barshanyń zań aldynda teńdigin qamtamasyz etýge baǵyttalǵan reformalardy jemisti jalǵastyrý tapsyryldy. Buǵan qosa Elbasy ákimshilik jáne qylmystyq zańdardy odan ári izgilendirý qajettigin de naqtylady. Sebebi, sońǵy kezderi ekonomıkalyq qylmystarǵa qatysty baptardy izgilendirý qajettigi baıqalýda.
Qylmystyq kodekstegi ekonomıkalyq qyzmet salasyndaǵy qylmystyq quqyq buzýshylyqtarǵa arnalǵan taraýda retteýdi qajet etetin jaıttar bar ekenin ómirdiń ózi kórsetip otyr. Mysaly, azamattyń salyqtan jaltarýy, kedendik tólem-alymdardyń durys tólenbeýi, taýar belgisi nemese ekonomıkalyq sharýashylyqtaǵy qarym-qatynas, jalǵan kásipkerlik te quzyrly mekeme quzyretinde sheshiletin ister. Ekonomıkalyq qylmystardy qylmyssyzdandyrýdy shaǵyn jáne jeke kásipkerlerdi qorǵap, olarǵa qoldaý kórsetýdiń bir amaly retinde baǵalaýǵa bolady.
Joldaýdaǵy «Sıfrly Qazaqstan» baǵdarlamasyn erekshe atap ótken jón. Bul turǵyda jańa óndiristerdi qalyptastyrýdyń mańyzdy bir sharty – ınnovasııalardy qamtamasyz etý. Sol sebepti, údemeli ındýstrıaldy-ınnovasııalyq damý baǵdarlamasy sheńberinde óndiris qýattaryn eseleý aıryqsha mańyzǵa ıe. Elbasy 3D prınterler, elektromobılder ispetti joǵary tehnologııalyq óndiristerdi damytýǵa basymdyq beredi. Munyń arqasynda básekege qabilettigimiz artaryna talas joq. Joǵaryda aıtqanymyzdaı, tolaıym tabysqa jetýde adamı kapıtaldyń orny aıryqsha, demek, jastardyń úsh tildi qatar meńgerýi el bolashaǵyna yqpal etedi. Iаǵnı, biz shet elderge bilimdi, bilikti urpaǵymyzben ǵana tanyla alamyz. Bıik maqsattar barlyq deńgeıde ýaqyt pen qordyń, onyń ishinde kadrlar rezervin talap etetini anyq.
Memleket basshysy dinı ekstremızmdi nasıhattaýdyń aldyn alýǵa, ásirese, ınternet pen áleýmettik jelide onyń jolyn kesýge asa kóńil bólýge shaqyrdy. Joldaý bolashaqqa baǵdarlanǵan. Ony tabysty júzege asyrý júgi jas urpaqqa júkteledi. Joldaýdyń basty maqsaty – «Qazaqstan-2050» Strategııasynyń mindetterin júzege asyrý. Elbasy atalǵan strategııalyq bastama «100 naqty qadam» Ult josparynyń negizinde oryndalatynyn qadap aıtty. Joldaýdy táýelsiz elimizdiń turaqty damýyna jol ashatyn, memleketimizdiń barlyq salasyna serpin beretin, halqymyzdyń ıgiligine baǵyttalǵan, naqty is-josparǵa negizdelgen tarıhı qujat retinde baǵalaǵan jón.
Mansurhan MAHAMBETOV,
Májilis depýtaty
