Mádenı shara Túrkııa Respýblıkasynyń Mádenıet jáne týrızm mınıstrligine qarasty Túrki álemi mýzykalyq ansambli men Astana qalasy fılarmonııasynyń sımfonııalyq orkestriniń qatysýymen ótti.
Qos orkestrdi Avstrııada bilim alǵan, «Altyn taıaqsha» dırıjerlar baıqaýynyń gran-prı ıegeri Ernar Nurtazın júrgizdi. Sonymen qatar, Túrkııanyń belgili ánshiler Chıdem Gúrdal men Djem Gúrdal óner kórsetti. Olar qazaqtyń belgili «Dýdaraı», túriktiń «Teńizdegi kesh», «О́tkenim – júregimdegi bir jara» atty ánderin oryndady.
– EKSPO arqyly qazaq eliniń ataǵy qazirgisinen de sharyqtaıtyny anyq. Bul kórme kóptegen salalarda, ásirese mádenıet baǵytynda Qazaqstan men ózge elderdiń qarym-qatynasyn jaqyndata túsedi dep senemin. Sonymen qatar, biz eki konsert ótkizýdi josparlap otyrmyz. Alǵashqysy búgin ótse, ekinshisi erteń, ıaǵnı 21 shildede EKSPO alańyndaǵy Túrkııa ulttyq pavılonynda uıymdastyrylady – dedi Chıdem Gúrdal.
Sharaǵa jınalǵan qaýym eki eldiń ulttyq, estradalyq ánderin tyńdap qaıtty. Bul konsert Qazaqstan men Túrkııanyń dostyǵyna arnalǵandyqtan ánshi Djem Gúrdal qazaq halqynyń ulttyq aspaby – dombyrada óner kórsetti.
– Túrkııalyqtar úshin qazaq halqynyń orny qanshalyqty ekenin osy keshten baıqaýǵa bolady. Aıta keterlik bir jaıt, biz Qazaq elin ata jurtymyz dep bilemiz. Osyǵan baılanysty bolar sońǵy kezderi bizdiń elde dombyraǵa degen qyzyǵýshylyq artyp keledi. Ystanbulda qazir dombyra tartýdy úıretetin arnaıy mektepter ashyldy, – dedi Djem Gúrdal.
Aıta keteıik, 2016 jyldyń 26 qazanynda dál osy ataýmen, ıaǵnı «Qazaqstan – Túrkııa dostyq áýenderi» atty Qazaqstan Táýelsizdiginiń 25 jyldyǵyna arnalǵan konsert ótken bolatyn. Onda Dımash Qudaıbergenov, Kámshat Joldybaeva, Gúlnur Orazymbetova, Aqerke Tájibaeva, Hanzada toby óner kórsetken edi. Al búgingi shara sonyń jalǵasy retinde de elorda turǵyndary men qonaqtaryna tartý etildi.
Budan bólek, uıymdastyrýshylar konsertte kórermenderge arnaıy lotoreıa taratyp, Túrik áýe joldary kompanııasy «Turkish Air» tarapynan beriletin Ystanbulǵa baryp qaıtý bıletteri oınatylady.
Aıan ÁBDÝÁLI,
«Egemen Qazaqstan»
