Atap aıtsaq, Aqtaýda sońǵy úsh jylda turǵyn úı, mektep pen kóshelerge jaryq jáne jylý berýde «jasyl tehnologııany» paıdalaný keń qoldanylyp keledi.
Nátıjesinde tek bir jylda jylýǵa jumsalar shyǵyn 30%-ǵa azaıyp, elektr qýaty 70%-ǵa únemdeldi. Solardyń biri - №3 orta mektep. Oqý ornynda energııa resýrstaryn avtomatty baqylaý jáne retteý júıesi jumys isteıdi jáne elimizde alǵash ret qolǵa alynǵan keshendi jobany ǵalamtor arqyly qashyqtan basqarýǵa bolady. Bul, bilim ordasy sý, gaz, elektr qýatyn qajetine qaraı tutynyp, artyq shyǵyn shyǵarmaıdy degen sóz. Mamandar 5 mln teńge jumsalǵan jobanyń óz qunyn 5 jylda aqtaıtynyn aıtady.
«Qazaqstan úkimeti men BUU arasyndaǵy «Jasyl kópir» áriptestik baǵdarlamasy aıasynda bul salaǵa jeke ınvestısııalar tartý qolǵa alyndy. Kásipkerler ózi turatyn eldi mekendegi jaryq jáne jylý berý júıelerine ınnovasııalyq tehnologııalar men qondyrǵylardy engizýge qatysa alady. Olardy satyp alyp, ornatýǵa jumsalǵan shyǵyndy memleket únemdelgen qarajat esebinen óteıdi, deıdi BUU Damý baǵdarlamasynyń jobalar menedjeri A. Belyı.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
