Bul súıinshili jańalyq jaǵalaýy týrıstik ınfraqurylymnyń qarqyndy damyǵan qalashyǵyna aınalyp kele jatqan Alakól kóliniń mártebesin taǵy bir kóterip tastady. Áýejaıdyń ashylýyna elimizdiń túkpir-túkpirinen syıly qonaqtar aǵylyp kelgen kún boldy búgin. Qutty bolsyn aıta kelgen syıly qonaqtar – Úshtóbe áýejaıynyń alǵashqy reısine minip keldi. Aq qanatty alyp qus budan bylaı kez kelgen meımandy demalys ornyna sharshatpaı jetkizip turatyn bolady. Basshylyq pen mamandardyń aıtýynsha, áýejaıdyń salynýy, aldymen, týrızmge kóp kóńil bólinip jatqanynyń belgisi.
Áýejaıdyń ashylý saltanatynda Almaty oblysynyń ákimi Amandyq Batalov sóz sóıledi:
– Búgin bárimiz úshin – tarıhı kún. 2014 jyly Elbasy oblysymyzǵa jumys saparymen kelgende Alakól kóliniń týrıstik áleýetin damytý týraly tapsyrma bergen edi. Osyǵan sáıkes aýqymdy sharalar iske asyryldy. Onyń nátıjesin ózderińiz kórip otyrsyzdar. Búginge deıin munda 1 mlrd. teńgeden astam qarjy tartylyp, jańa áýejaı boı kóterdi.
Ákimniń aıtýynsha, taǵy bir jaǵymdy jaǵdaı jasalyp otyr. Ol – bılet qunynyń arzandyǵy. Halyqqa tıimdi bolý úshin bılet baǵasyn sýbsıdııalaýǵa respýblıkalyq jáne oblystyq bıýdjetten 177,2 mln.teńge qarjy bólingen.
Qurylysy 2015 jyly bastalǵan áýejaı ákimshiliginiń nysanyna jergilikti áimdik tarapynan 4,5 gektar jer bólinipti. Kóp jyldan beri toqtap qalǵan áýe qatynasy kezinde eskirgen, qaraýsyz qalǵan ushý-qoný jolaǵy qaıta jańǵyrtylyp, áýe qozǵalystaryn uıymdastyrýǵa eń qajetti degen radıotehnıkalyq jáne meteorologııalyq qural-jabdyqtar jańartylǵan.
Alakólge kóńil aýdarý, týrızm ortalyǵyna aınaldyrý isi áýejaımen shektelmese kerek. Áýe keńistigi arqyly kóp kisi kelmegi – mundaǵy jaǵdaıǵa da baılanysty. Sol sebepti, aldaǵy jyldar enshisinde kópsalaly demalys oryndarymen qatar ózge de týrıstik maqsattaǵy nysandar salý jospary tur.
Jańa áýejaıdyń ornynda 1980-90 jyldar aralyǵynda Úsharal – Almaty baǵyty boıynsha jolaýshy tasymaldaýmen aınalysqan aerodrom bolǵan. Budan bylaı kópten beri aspany tym-tyrys turǵan Úshtóben qalasynyń 12-shi kılometrinenen IаK-40, AN-24, Embraer-124, Sıerdjı-200 jáne tik ushaqtardyń dybysy estiletin bolady. Osyǵan deıin sonaý Almatydan, Taldyqorǵannan jetý úshin bir kúnin joǵaltatyn demalýshylar endigide kól jaǵalaýyna 86 shaqyrym jol júrip barady.
«Jetisý» áýe kompanııasy aptasyna tórt ret «Astana –Úsharal – Astana» jáne úsh ret «Taldyqorǵan – Úsharal – Taldyqorǵan» baǵyty boıynsha jolaýshy tasymaldamaq. «Jetisý» áýekompanııasynyń prezıdenti Qalmuhamet Dóńsebaevtyń aıtýynsha, keleshekte bul baǵyttarǵa «Almaty – Úsharal – Almaty» baǵyty qosylýy múmkin. Astana baǵyty boıynsha jol aqysy 16 myń, al oblys ortalyǵy Taldyqorǵan qalasynan qatynaý 8 myń teńge.
Alakólge kelýshiler sany byltyr 452 myń adamǵa jetken. Bul kórsetkish 2015 jylǵy nátıjemen salystyrǵanda 3 ese kóp. Al bıyl olardyń sanyn 700 myńnan asady dep boljanýda. Jańa áýejaıdyń ashylýy týrıster sanynyń ósýine septigin tıgizedi, al, bul óz kezeginde aımaq ekonomıkasyna úlken serpilis ákeledi. Keleshekte aýdandyq bıýdjettiń 50 paıyzyn týrızm salasy tolyqtyrady dep kútilýde.
Almas NÚSIP,
«Egemen Qazaqstan»
Almaty oblysy
