Festıvaldiń ashylýyna oraı qyzyl kilem tóseldi. Onda da Nıkolas Keıdj kilemmen júrmeı, óziniń jankúıerlerine asyqty. Qolyn berip, bárimen fotoǵa túsip shyǵýǵa tyrysty. Tipti, qyzyl kilemdi eki ret aınalyp shyqty. Al festıvaldiń ashylý saltanynda «Sálemetsiz be!» dep, jınalǵan jurtpen qazaq tilinde amandasty. Keıdj jas akterlarǵa da óz keńesin berdi.
«Kıno sizdiń qııalyńyz ben qoǵam arasyndaǵy aına ispetti. Siz beıtarap pozısııany ustaýyńyz qajet. Aýdıtorııanyń ózi qııalyn sharyqtatyp, bıik armandarǵa umtylýy tıis. Al qııaldy damytý úshin mıfologııa, shejireler, ertegiler jáne taǵy basqa ádebı shyǵarmalardy jıi oqý kerek», deıdi Nıkolaı Keıdj.
Festıvalden keıin akter Qazaq ulttyq óner ýnıversıtetine bardy. Sol jerde ol qazaqtyń «Adaı» kúıi» men «Kózimniń qarasyn» tyńdap, qııaldy damytýǵa qatysty áńgimesin jalǵastyrdy. Akterlik jolǵa túsý ońaıǵa soqpaǵanyn da ashyq aıtty.
«Shynymdy aıtsam, basynda kastıngter kezinde maǵan ylǵı «Joq!» dep jaýap beretin. Joq, joq, joq... О́z-ózime degen senim joǵala bastady. Bir rette qatty alańdap ketkenim sonsha, jańaǵy «joqtardyń» kesirinen aýrýxanaǵa da tústim. Sodan keıin taǵy bir kastıngke barýǵa bel býdym. О́tip kettim! Negizi, menen jaqsy jazýshy da shyǵatyn edi», deıdi Keıdj.
Ýnıversıtette bolǵan jıynnan keıin mártebeli meımanǵa dastarxan jaıyldy. Sol jerde ýnıversıtet rektory Aıman Musaqojaeva Gollıvýd juldyzyna qazaqtyń dástúri boıynsha shapan japty.
«Nıkolasqa qazaqtyń shapany óte unady. Túsi de, materıaly da jaqsy dedi. Tipti, onymen fılmge de túsýge bolatynyn jetkizdi», dedi Aıman Qojabekqyzy.
