– Bul «SGS» kompanııasynyń Qazaqstan aýmaǵyndaǵy birinshi kómir-hımııa zerthanasy. Atalǵan kompanııa kómirdi ınspeksııalaý men sertıfıkattaý boıynsha álemniń kóptegen elderinde qyzmet jasap keledi. Jańa zerthana «Shubarkól Premıýmnyń» klıentter bazasyn arttyryp, eksporttyq naryqqa shyǵýyna septigin tıgizedi. Bizdiń sertıfıkattarymyzdy álemdik treıderlerdiń bári de moıyndaıdy jáne biz maquldaǵan ónimderdiń sany men sapasyna senimdi bola alady, – dedi ashylý saltanatynda kompanııanyń mıneraldy shıkizat departamentiniń dırektory Alekseı Zotov.
Shynynda da, buryn kómir synamalaryn Reseıdiń Novokýznesk qalasyna aparýǵa týra keletin edi. Taldaýlar endi ózimizdiń ken ornynda jasalatyn boldy. Zerthana bazasynda kómir óndirýshi kásiporyndarǵa halyqaralyq úlgidegi sapa sertıfıkattary beriledi.
– «SGS» kompanııasymen biz birtalaı ýaqyttan beri áriptestik baılanystamyz, – deıdi «Shubarkól Premıým» kómir razrezi bas dırektorynyń birinshi orynbasary Aleksandr Lontkovskıı. – Búgingi ashylyp otyrǵan zerthana – biz úshin aıtarlyqtaı jetistik. «SGS» kompanııasynyń kómir ónimderiniń sapasyn basqarý tájirıbesin paıdalanyp, bizdiń kómirimiz tek Qazaqstannyń ǵana emes, sondaı-aq, Reseıdiń de naryǵyn jaýlaıdy degen úmitimiz zor.
Jańadan ashylǵan kómir-hımııa zerthanasy qazirgi ýaqytta kúkirt quramyn Eshka ádisimen anyqtaý, kúl quramyn anyqtaý, ushpa zattardyń shyǵýyn anyqtaý, jalpy ylǵal quramyn anyqtaý, otyn janýynyń joǵary jáne tómengi jylýyn anyqtaý jáne elektik taldaý jumystaryn júrgizýde. Qyzmet túrleri keleshekte kóbeıe túspek. Zerthana taldaýyna óz kómirlerin tilek bildirgen kásiporyndardyń bári de ótkize alady.
Aıta ketý kerek, «SGS» kompanııasy ınspeksııalyq qyzmet, saraptaý, synaý jáne sertıfıkattaý salasy boıynsha álemdik kóshbasshylar qatarynan sanalady. Onyń dúnıe júzinde 2 myńnan astam keńseleri men zerthanalary jumys isteıdi. Al 2016 jyldyń aqpan aıynda qurylǵan «Shubarkól Premıým» JShS jylyna joǵary sapaly 7,5 mln tonna kómir shyǵarady. Qaraǵandylyq kásiporyn men álemdik kompanııanyń áriptestik baılanysy kómir ónerkásibin jańa beleske kóteredi dep senemiz.
Mıras Asan,
«Egemen Qazaqstan»
Qaraǵandy oblysy,
Nura aýdany
