Mundaǵy ár senbi saıyn uıymdastyrylatyn jármeńkede Aqsý, Sarqan, Kóksý, Eskeldi aýdandary men Taldyqorǵan qalasynyń sharýalary, «Jumyspen qamtý jol kartasy - 2020» memlekettik baǵdarlamasynyń qatysýshylary ózderi ósirip, óndirgen et jáne sút ónimderin, jemis pen kókónisterin tıimdi baǵamen saýdalaıdy. Bul týraly oblys ákiminiń birinshi orynbasary Lazzat Turlashovtyń tóraǵalyǵymen ótken Baǵa men tarıfterdi turaqtandyrý jónindegi jedel shtabtyń otyrysynda qala ákiminiń orynbasary Nurlan Mámbetjanov aıtty.
Jalpy azyq-túliktiń, sonyń ishinde áleýmettik mańyzdy sanalatyn 19 túrli ónim baǵasynyń ósýine jol bermeý maqsatynda saýda oryndarynda azyq-túlik óndirýshilerge oryndy tegin berý, senbi saıyn azyq-túlik jármeńkesin ótkizý sııaqty sharalar atqarylýda. Máselen, jyl basynan beri Astana, Almaty, Taldyqorǵan qalalarynda jáne aýdan ortalyqtarynda jalpy sany 760 jármeńke ótkizilgen. Taldyqorǵan qalasynda jergilikti kásiporyndar «Aqqus» JShS-nyń, «JLC Sút» seriktestiginiń, Úshtóbe sút zaýytynyń ónimderin deldalsyz tikeleı satatyn arnaıy oryndar men dúkender belgilengen.
Azyq-túlik baǵasyn turaqtandyrý sharalaryna «Jetisý» ÁKK-niń turaqtandyrý qory da úlken septigin tıgizip otyr.
