Oblys ekonomıkasynyń damýyna serpin beretin jalpy óńirlik ónim kólemi sońǵy 6 aıda 1,1 trln teńgeni qurapty. Bul rette negizgi úlesti ónerkásip, aýyl sharýashylyǵy men qurylys salasy qosyp otyr. Jalpy óńirimizdegi ónerkásip salasy óńdeý, taý-ken, bý, elektrmen jabdyqtaý, gaz, bý berý jáne aýa baptaý ónerkásibinen quralady. Sońǵy 6 aıda óńdeý salasynda 250,4 mlrd teńgeniń ónimi óndirilgen. О́sim negizinen tamaq ónimderin óndirý, farmasevtıkalyq, metallýrgııa, mashına jasaý, jeńil ónerkásip ónimderi esebinen júzege asyp otyr.
«Oblysymyzdaǵy ındýstrıalandyrý kartasynyń ekinshi bes jyldyǵy josparyna saı 135 jobany júzege asyrý josparda bar. Onyń ishinde aǵymdaǵy jyly 17 jobany iske asyrý kózdelýde. Atalǵan 17 jobanyń jalpy quny – 37 mlrd teńgeni quraıdy. Eger jobalar tolyq iske assa, 909 jańa jumys orny ashylatyn bolady», - deıdi Arman Sábıtov.
О́ńirde saýda salasynda damý baıqalady. Sońǵy 6 aıda bólshek saýda aınalymy 182,3 mlrd teńgeni qurap, 18 mlrd teńgege artqan. Al, syrtqy saýda aınalymy 1,1 mlrd AQSh dollaryna jetse, onyń ishinde eksport – 468,3 mln AQSh dollaryn, ımport – 620,6 mln. AQSh dollaryn qurap otyr. Eksportqa negizinen et, tamaq ónimderi, dári-dármek, metall, mashına, qural-jabdyq, toqyma buıymdary shyǵarylýda.
Aıta keteıik, oblystyń eksport qurylymynda Nıderlandy, О́zbekstan, Reseı, Qytaı jáne Aýǵanystan memleketteriniń úlesi mol.
