«Qazaqstandyq Technovation komandasy Google-diń bas dırektory Sýndar Pıchaıge Google-diń shtab-páterinde óz jobalaryn usyndy», - delingen Qazaqstandaǵy AQSh elshiliginiń Instagram-akkaýntynda.
Almatydaǵy AQSh-tyń bas konsýldyǵy buǵan deıin habarlaǵandaı, Technovation World Pitch sammıtine ártúrli elderden alty komanda qatysyp otyr. Onda Qazaqstan namysyn birden eki komanda qorǵaýda.
#MakerspaceAlmaty «/flash» komandasy álemniń túkpir-túkpirinen kelgen 100-den astam komandany artta qaldyryp, endi, óz ıdeıalaryn Sılıkon alqabynda ótip jatqan World Pitch sammıtinde tanystyrýda. «/ Flash» - joǵary synypta oqıtyn tórt qyzdan quralǵan komanda. Olar óz tálimgerlerimen birge jasóspirimderdiń qaýipsizdigin arttyrýǵa baǵyttalǵan mobıldik qosymsha - «QamCare»-ny jasap shyǵarý úshin aılap ter tókti. «QamCare» jetkinshekterge qaýipti jaǵdaı kezinde ózderiniń GPS koordınattaryn jaqyndaryna jiberýge arnalǵan.
Technovation - bul jas áıel azamattaryna tehnologııalar men kásipkerliktiń arqasynda óz qoǵamyndaǵy túıitkilderdi sheshe otyryp, kóshbasshy jáne novator bolýǵa múmkindik beretin jahandyq bastama.
Makerspace jobasy tehnologııalardyń kómegimen ınnovasııalarǵa, shyǵarmashylyqqa jáne problemalardyń sheshilýine qoldaý bildiretin jahandyq qozǵalystyń bir bóligi bolyp tabylady.
