Sharaǵa oblys ákimi Qyrymbek Kósherbaev qatysyp, aýyl sharýashylyǵy ónimderiniń jármeńkesimen tanysty.
Jármeńkede Astana turǵyndary men qala qonaqtaryna Qyzylorda oblysynyń 30 sharýashylyǵy 40 túrli aýyl sharýashylyǵy ónimderin usyndy. Onyń ishinde, Syr eliniń maqtanyshy, negizgi daqyl - kúrish, Qyzylordanyń búkil Qazaqstanǵa áıgili qaýyn-qarbyzy, Aral teńiziniń dámdi balyǵy jáne basqa da ónimder bar. Naqtyraq aıtqanda, kúrish – 60 tonna, jylqy eti – 3 tonna, taýyq eti – 1 tonna, sút ónimderi – 4 tonna, qymyz – 0,5 tonna, shubat – 0,5 tonna, ara baly - 0,2 tonna, balyq - 15 tonna, konfet – 2 tonna, kókónis, qııar, qyzanaq – 20 tonna, qulpynaı, alma, almurt, órik – 1 tonna, kartop – 35 tonna, sábiz – 8 tonna, qyryqqabat - 10 tonna, sók, talqan – 0,5 tonna, as tuzy – 5 tonna, qaýyn – 40 tonna, qarbyz – 50 tonna t.b. ónimder bar.
- Bıyl jármeńke úshinshi ret uıymdastyrylyp otyr. Barlyǵy 270 tonnaǵa jýyq ónim alyp keldik. Ákelgen ónimderdiń ishinde, árıne Syrdyń aq kúrishi, baý-baqsha, balyq bar. Byltyrdan bastap qaýyndy eksporttyq ónim qataryna qosyp jatyrmyz. Sonymen birge, sıyr, jylqy etinen 10 tonna et ónimderin de ákeldik. Jármeńkedegi ónimder naryq baǵasynan 10-20 paıyzǵa tómen satylýda,- dedi Qyzylorda oblysy aýylsharýashylyǵy basqarmasynyń basshysy Bahyt Jahanov.
Sonymen qatar, dál osy kúni syrboıylyq ónerpazdardyń qatysýymen merekelik konsert uıymdastyrylady. Elordanyń ortalyq parkinde «Syr samaly» atty konsert ótti. Budan bólek, 13 tamyz kúni «Qazanat» ıppodromyndaǵy etnoaýylda estrada ánshileri, dástúrli oryndaýshylar, sondaı-aq «Tomırıs» bı ansambli óner kórsetti.
Esterińizge sala keteıik, Astanada «EKSPO-2017» halyqaralyq mamandandyrylǵan kórmesi aıasynda 10-14 tamyz kúnderi Qyzylorda oblysynyń mádenı kúnderi ótýde.
