Orynbaı Balmurat, «Egemen Qazaqstan»
Veloshabandozdar Astananyń Túrkistan, Dostyq, Aqmeshit jáne Qonaev kósheleri boıymen árqaısysy 1,6 shaqyrymdyq 35 aınalymnan turatyn qashyqtyqty artqa qaldyryp, «Báıterek» monýmenti túbindegi márede jarysty aıaqtady.
Tas joldaǵy tartysty ótken velobáıgede Ulybrıtanııadan kelgen shabandoz Edvard Klensı aldyna jan salmady. Máre syzyǵyn ekinshi bolyp Nıkolas Marını (Italııa) kesip ótti. Skott Shanderlend (Ulybrıtanııa) bolsa, qola júldege qanaǵat etti. Al jerlesimiz, Astana Pro Team klýbynyń múshesi Baqtııar Qojataev Azııanyń úzdik veloshabandozy atandy.
Jalpy, «Astana EXPO 2017 International Criterium» velojarysyna 15 elden 20 komanda qatysty. Olardyń arasynda Álemdik týrlardyń kásipqoı komandalary, qurlyqaralyq komandalar men ulttyq quramalar boldy. Al bul ujymdardyń sapynda «Grand-týrlardyń» jeńimpazdary men júldegerleri, Olımpıada medaliniń ıegerleri óner kórsetti. Áıgili «Týr de Frans» velokópkúndiginiń byltyrǵy jeńimpazy, brıtandyq Team Sky komandasynyń múshesi Krıs Frýmnyń jáne Astana Pro Team ujymynyń kóshbasshysy Fabıo Arýdyń jáne taǵy basqa ataqty sportshylardyń Astana velobáıgesine arnaıy kelip qatysýy jarystyń óte joǵaryda deńgeıde uıymdastyrylǵanyn kórsetse kerek.
Jeńimpaz ben júldegerlerdi marapattaý rásimine Mádenıet jáne sport mınıstri Arystanbek Muhamedıuly, Qazaqstan Trıatlon federasııasynyń prezıdenti, UQK tóraǵasy Kárim Másimov, Astana qalasynyń ákimi Áset Isekeshev qatysty.
Marapattaý rásimi kezinde velosport jankúıerleri úshin qýanyshty habardy «Astana» veloklýbynyń bas menedjeri Aleksandr Vınokýrov jetkizdi. Áıgili veloshabandoz BAQ ókilderine bergen suhbatynda «Astana EXPO 2017 International Criterium» velobáıgesin dástúrli týrnırge aınaldyrý jóninde kelissózder júrgizilip jatqanyn habarlady.
Qaırat ÁBILDA,
«Egemen Qazaqstan»
