Sýretti túsirgen: Abzal QALIEV
Korporasııa qyzmetkerleri buqaralyq aqparat quraldaryn eń áýeli «1414» biryńǵaı baılanys ortalyǵynyń jumysymen tanystyrdy. Ortalyq basshysy Anar Ýlmanovanyń sózine súıensek, kúnige ár qyzmetker 200-ge jýyq qońyraýǵa jaýap beredi eken. Qazirgi tańda call-ortalyq táýlik boıy jumys isteıdi. Kúnine «1414» qyzmetine 15 myńnan astam adam júginse, túngi mezgilde orta eseppen 500-deı qońyraý túsedi.
A.Ýlmanovanyń aıtýynsha, «1414» qyzmetine júginetinder kóbeıgendikten, call-ortalyqqa habarlasý kúnnen kúnge qıyndap keledi. Osyǵan baılanysty aldaǵy ýaqytta ortalyqta jańartý jumystary júrgizilmek.
«Azamattarǵa arnalǵan úkimettiń» taǵy bir ereksheligi ‒ munda múmkindigi shekteýli jandardyń jumys isteýine jaǵdaı jasalǵan. Búginde korporasııada 470 múmkindigi shekteýli adam jumys isteıdi. Al «1414» baılanys ortalyǵynda olardyń sany 11 eken. Olardy jumysqa ákelý, úıine aparyp salý ortalyqtyń mindetinde.
Call-ortalyqtyń qyzmeti jaqsarǵanyn ári tanymaldyǵy artqanyn mynadan da baıqaýǵa bolady. Bıyl «1414»-ke 2 mıllıonnan astam qońyraý kelip túsken. Al 2016 jyly habarlasqandar sany 3,5 mıllıonǵa jýyq bolǵan eken. Ortalyq basshylyǵynyń aıtýynsha, qońyraýǵa jaýap berýge mindetti qyzmetkerlerdiń bárine trenıngter uıymdastyrylyp turady. Olarmen mekemeniń arnaıy psıhology jumys isteıdi.
Sodan keıin buqaralyq aqparat quraldary ókilderi men blogerler Astana qalasyndaǵy Halyqqa qyzmet kórsetý ortalyǵyna baryp, jumys barysymen tanysty. Korporasııa basshylyǵy qazirgi tańda HQO-da kezek kútý ýaqyty azaıǵanyn, adamdar ári ketse 15 mınýt kútetindigin jetkizdi. Muny tekserip kórý úshin ortalyq qyzmetine júginip kórgen edik. On mınýt ótpeı-aq kezegimiz keldi. Burynǵydaı uzyn-sonar kezek joqtyń qasy. HQO-daǵy kelesi jańashyldyq ‒ qyzmet alý jeńildetilgen. Buǵan deıin ESQ mindetti bolsa, endigi jerde uıaly telefon arqyly kerekti qujatqa qol jetkizýge múmkindik bar.
«Azamattarǵa arnalǵan úkimettiń» 70 shuǵyl toby turaqty túrde shalǵaı aımaqtarǵa baryp halyqqa kerekti qyzmet kórsetedi. Korporasııa basqarma tóraǵasynyń orynbasary Ásemgúl Baltasheva aldaǵy ýaqytta shuǵyl toptyń sanyn kóbeıtýdi kózdeıtinin jetkizdi. Sonymen qatar, korporasııa aldaǵy ýaqytta «Qazposhta» kompanııasymen birlesip, shalǵaı aýyldarda HQO qyzmetterin usynýdy josparlap otyr.
Tanystyrý jumystary barysynda Aqparat jáne kommýnıkasııalar mınıstri Dáýren Abaevtyń qatysýymen baspasóz jıyny ótti. Onda halyqqa qyzmet kórsetý ortalyqtaryna qatysty birqatar máseleler talqylandy.
Aqparat jáne kommýnıkasııalar mınıstri Dáýren Abaevtyń pikirinshe, Halyqqa qyzmet kórsetý ortalyǵyndaǵy kezektiń týyndaýyna aqparattyq júıedegi aqaý sebep bolady. Mınıstr bul máseleniń jyl sońyna deıin sheshiletinin málimdedi. Onyń aıtýynsha, aqaýdyń kesirinen bıyl aqparattyq júıede 35 saǵattyq irkilis bolǵan. Sonymen qatar, Dáýren Abaev keleshekte senim telefondarynyń bárin biriktirip, ony «1414» ortalyǵyna tapsyrýǵa nıetti ekenin jetkizdi. Bul joba kelesi jyly júzege asady.
«HQO-daǵy kezek «Azamattarǵa arnalǵan úkimet» mekemesiniń nemese onyń qyzmetkerleriniń kemshiligi emes. Másele aqparattyq júıeniń durys jumys istemeýinen týyndaıdy. Ony árdaıym jańalap otyrý kerek. Onyń ústine, birde-bir aqparattyq júıe «Azamattarǵa arnalǵan úkimetke» tikeleı tıesili emes», dedi Dáýren Abaev jýrnalıstermen kezdesýinde.
Sonymen qatar, mınıstr halyqqa qyzmet kórsetý ortalyqtary qyzmetkerleriniń jalaqysyn kóterý jónindegi usynysty qoldaıtynyn jetkizdi. «О́kinishke qaraı, HQO qyzmetkerleriniń jalaqysy joǵary emes. Muny Úkimet deńgeıinde sheshý kerek. Qazir osy másele boıynsha jumystar atqarylyp jatyr», dedi Dáýren Abaev.
Búginde elimizde «Azamattarǵa arnalǵan úkimet» memlekettik korporasııasynyń 349 front-keńsesi jáne 637 bek-keńsesi bar. Front-keńsede qyzmet alý dál sol sátte, mekeme ishinde júrgiziledi. Bek-keńsede usynylǵan qyzmet qoldanýshy nazarynan tys jaǵdaıda ótedi. Korporasııada jalpy 22 myńǵa jýyq qyzmetker jumys isteıdi. Byltyr mekeme kórsetken qyzmetterdiń sany 37 mıllıonnan asyp túsipti. Solardyń 24,5 mıllıony elektrondy túrde kórsetilgen.
«Azamattarǵa arnalǵan úkimet» memlekettik korporasııasynyń basqarma tóraǵasy Abylaı Ospanovtyń aıtýynsha, elordada sheteldikterdi tirkeıtin arnaıy halyqqa qyzmet kórsetý ortalyǵyn ashý josparda bar. Sondaı-aq, avtokólikterge arnalǵan taǵy bir qyzmet kórsetý ortalyǵy iske qosylady.
«О́z usynystarymyzdy Ishki ister mınıstrligine jiberdik. Qazirge deıin kelissózder júrgizip, ortalyq ornalasatyn ǵımarattardy tańdadyq. Qyzmetti bólisý máselesi aldaǵy ýaqytta anyqtalady», dedi Abylaı Ospanov.
Abaı ASANKELDIULY,
«Egemen Qazaqstan»
