Saılaý jasyryn daýys berý arqyly janama saılaý quqyǵy negizinde júrgizildi. Basqasha aıtqanda, aýyldyq okrýg, kent jáne aýyl ákimderi tórt jyldyq ókilettik merzimge tıisinshe aýdandyq, qalalyq máslıhattardyń depýtattary bolyp tabylatyn saılaýshylar tarapynan saılandy.
Saılaýǵa Qaraǵandy oblysynyń 16 aımaǵy qatysty, onyń 129-y aýyldyq okrýgter, aýyldar men kentter. Saılaýǵa barlyǵy 388 úmitker qatysqan, onyń 287-si er adam jáne 101-i áıel adam.
Komıssııa tóraǵasy Erǵara Aımaǵambetovtiń aıtýynsha, ótken saılaý qorytyndysy boıynsha 129 ákim berilgen daýys basymdyǵymen saılanyp, onyń 83-i aýyldyq okrýgterdiń, 22-si kent jáne 24-i aýyl ákimderi bolyp otyr. Saılanǵan aýyl ákimderiniń 121-i er adam, 8-i áıel adam. Barlyq saılanǵan ákimderdiń joǵary bilimderi bar. Olardyń kópshiligi ınjenerler men muǵalimder, ekonomıster men aýyl sharýashylyǵy qyzmetkerleri jáne zańgerler.
Atalǵan saılaýǵa jergilikti bıýdjetten 20 mıllıon teńgeden astam qarajat bólingen. Aıtalyq, ár úmitkerge úgit-nasıhat jumystaryn júrgizý úshin 66 500 teńge qarastyrylypty.
Endi saılanǵan ákimder ózderiniń qyzmettik mindetterine kirispes buryn, eki aptaǵa sozylatyn arnaıy tekseristen ótýi qajet.
Mıras ASAN,
«Egemen Qazaqstan»
Qaraǵandy oblysy
