Bıylǵy jarys Qurlyqtyq hokkeı lıgasynda óner kórsetip júrgen azýly klýbtardyń qatysýymen este qaldy. Sondaı-aq, Shveısarııadan «Davos» hokkeı ujymynyń arnaıy kelýi de týrnırdiń aıasyn keńitip, bedelin arttyra tústi.
Jarystyń sońǵy kúni muz aıdynynda «Barys» pen Vladıvostoktyń «Admıral» klýby kúsh synasty. Oıyn óte shıelenisti jaǵdaıda órbidi. Hokkeıshiler muz ústinde jıi-jıi ustasyp, tipti tóbelesip qalyp jatty. Qalaı bolǵan kúnde de, «Barys» oıynshylarynyń osynyń aldynda «Traktormen» bolǵan óte tartysty matchta kóp kúsh jumsap, qaljyrap qalǵandyqtary baıqalyp turdy. Ol oıynda elordalyq klýb qonaqtardy býllıt boıynsha 3:2 esebimen áreń degende jeńgen bolatyn.
Mine, sonyń saldary bolsa kerek, «Barys» klýby qarsylasyna eń quryǵanda bir shaıba da soǵa almaı, 0:3 esebimen jeńilip qaldy. Oıynnyń birinshi kezeńinde esepti qonaqtardyń shabýylshysy Nıkolaı Glýhov ashty. Ekinshi kezeńde Maksım Kısyn esepti 2:0-ge jetkizdi. Al sońǵy kezeńde Nıkolaı Glýhov osy oıyndaǵy óziniń ekinshi shaıbasyn salyp, kezdesýdiń sońǵy núktesin qoıdy.
«Admıral» osy jeńisinen keıin týrnır kestesinde ekinshi orynda turǵan «Barysty» yǵystyryp, kúmis júldeger atandy. Al týrnırdiń bas júldesi – Prezıdent kýbogy osy jarysta ótkizgen bes oıynnyń bireýinde ǵana jeńilgen Nıjnekamskiniń «Neftehımık» komandasyna buıyrdy. Aıta ketetin jaıt, qazirgi ýaqytta Tatarstannan kelgen bul klýbty Qazaqstan qurama komandasy men «Barystyń» bas bapkeri bolǵan Andreı Nazarov jattyqtyrady.
Qaırat ÁBILDA,
«Egemen Qazaqstan»
