Máselen, ár úıden on shaqty bala-shaǵa órbitken, Keńes ókimeti kezinde «Pravda» gazetiniń tilshisi izdep kelip maqala jazǵan Aqtas aýylyndaǵy adamdardyń aırandaı uıyǵan birligin kórip qyzyǵasyz.
Bul aýyl oblys boıynsha áli de kópbalaly bolýymen erekshelenedi.
At jalyn tartyp minip, azamat bolǵan soń qalaǵa oqý, bilim izdep ketkeni ketti, al qalǵandaryna jeke shańyraq kóterý úshin úı kerek. Mundaıda bul aýylda asarǵa aýyldastaryn shaqyrady. Qalada ǵoı, ómirden ótkeninshe esikpe-esik otyrǵan qudaıy kórshisiniń nyspysyn bilmeı ketetini. Al birligi bekem bul aýyldyń jóni bólek. Asarǵa shaqyrylǵan azamattar ara, balta, kúrek sııaqty qural-saımandaryn arqalap ózderi jetedi. О́ıtkeni, bul azamattardyń kúni erteń ózine kerek bolǵanda janynan tabylaryn biledi.
Batyr ana Jumagúl Ábildaeva munyń sebebin aýyl adamdarynyń qazaqy baýyrmaldyqty, qınalǵanǵa qolushyn beretin jaqsy dástúrlerimizdi saqtap qalǵandyǵymen túsindiredi.
– Balalar jetildi, aldy úı bolyp jatyr. Táýbe, nemereler kóbeıip keledi, olarǵa bólme kerek. Sondyqtan, eski úıi-
mizdi buzyp, asarlatyp úlken úı turǵyzyp jatyrmyz. Taý betkeıinde turǵan soń bizge qys erte túsedi. Sondyqtan kúzdiń alǵashqy aılaryna jetkizbeı bitirip alamyz. Bizdiń aýyldyń adamdarynda álgi burynnan aıtylatyndaı úıine kelgen qonaqqa qoıyn soıyp kútip, jalǵyz atyn jetektetip jiberetin ultymyzdyń saqylyq minezi saqtalǵan. Eshkim eshkimge mindetsinbeı ázil aıtyp júrip, bir qazannan as iship júrip demde bitirip tastaıdy. Batyr ana osylaı deıdi. Bul aýyldyń uıymshyldyǵy tek asarlatyp úı salýmen bitpeıdi eken. Kórshi Qoshqarata aýylynyń azamattarymen ujymdasa mal azyǵyn daıyndap jatyr. Erteń qylyshyn súıretip «kári quda» kelgende, qolǵa qaraǵan malǵa kóktemge deıin jetetin jem-shóp kerek.
Aýyl aqsaqaly Oralbek Imanálıev qarııa ekpe jońyshqany tolyq oryp bitkenderin aıtady. Endi tabıǵı shóp daıyndalyp jatyr.
Baqtııar TAIJAN,
«Egemen Qazaqstan»
Ońtústik Qazaqstan oblysy
