О́ńirdegi jer aýmaqtaryn aýyl sharýashylyǵyna qajetti egistikter, shabyndyqtar, jaıylymdar alyp jatyr. Ýspen aýdanynda memleket menshigine «Dılnaz» sharýa qojalyǵynyń 358 ga egistik jeri (paıdalanylmaǵan jer) qaıtaryldy, konkýrs qorytyndysy boıynsha ol jer «Mansur» fermerlik qojalyǵyna berildi. О́tken jyly Ýspen aýdanynda «Dvın» qojalyǵyna (bul ShQ ıesi basqa eldiń azamaty) zańsyz berilgen 900 ga egistik prokýratýranyń júrgizgen jumysynyń arqasynda memleketke qaıtaryldy, al aǵymdaǵy jyldyń mamyr aıynda bul jer ashyq konkýrs nátıjesi boıynsha basqa paıdalanýshyǵa berildi. «Beloserkovskıı» JShS-na bekitilgen bir jarym myń ga egistik jáne 1,8 myń ga basqa da aýyl sharýashylyq jerleri uzaq ýaqyt boıy paıdalanylmaǵan. Endi bul qunarly jerlerdi «BIK» sharýa qojalyǵy basqaryp otyr.
Oblystyq Jer qatynastary basqarmasy jaýapsyz jer paıdalanýshylarǵa qoldanylatyn tıimdi sharalardyń biri – aýyl sharýashylyǵy maqsatyndaǵy paıdalanylmaıtyn jerge salyqty kóbeıtý kerek dep otyr. Mysaly, tekseristerden keıin 54 jer paıdalanýshy jalpy somasy 4,4 mıllıon teńge salyq tólegen. Nátıjesinde keıbir jer ıeleri 21 myń ga bos jatqan jerden óz erkimen bas tartty. Prokýratýranyń usynysy boıynsha qazir óńirde Jerdi qashyqtan barlap qaraýdyń ǵaryshtyq júıesi paıdalanyla bastady. Mundaı qyzmetti «Qazaqstan Ǵarysh Sapary» Ulttyq kompanııasy» AQ usynyp otyr.
Jergilikti bılik oryndary jerlerdi, ınjenerlik jelilerdi, sý qorǵaý aımaqtaryn túgendeý jáne qala qurylysy qujattamalaryn salystyrý úshin oblys ortalyǵy aýmaǵyn sýretke túsirýge 16,5 mıllıon teńge bólmekshi. Ekibastuz qalalyq ákimdigi jerdi túgendeý jáne jer telimderin ózdiginen basyp alý jaǵdaılaryn anyqtaý maqsatynda jańa zaman tehnologııalaryn paıdalanýda. Osyndaı jumystardyń nátıjesinde bıýdjetke jer paıdalanýshylardan 1,14 mlrd teńge túsipti.
Farıda BYQAI,
«Egemen Qazaqstan»
Pavlodar
