Ult aqyny, Memlekettik syılyqtyń laýreaty – Ulyqbek Esdáýlettiń dramatýrgııa baǵytyndaǵy alǵashqy «Zere» pesasy – Qallekı teatrynyń aktrısasy, Qazaqstannyń halyq artısi – Gúljan Áspetovanyń sahnadaǵy 50 jyldyq shyǵarmashylyǵyna oraı aktrısanyń tabıǵı talanty men erekshe bolmysyna arnaıy jazylǵan týyndy. Qazaq teatrynyń kıeli sahnasyna 1967 jyly alǵash Qaragóz bolyp qadam attaǵan aktrısa búgin 70 jyldyq mereıtoıynda alǵashqy Zere Ana obrazyna jolyn ashyp, ǵumyr syılamaq.
Derekkózdiń habarlaýynsha, drama kemeńger jazýshy Muhtar Áýezovtiń «Abaı joly» atty roman-epopeıasynan bek tanys klassıkalyq keıipkerlerdi kórermen qaýymmen qaıta júzdestiredi. Alyp – anadan týady. Abaıdyń ákesi Qunanbaıdyń aǵasultan bolmas buryn, jas shaǵynda dana, meıirban anasy Zereden alǵan tálim-tárbıesi tektiliktiń nyshanyna aınalady. Zere – otbasy, oshaq qasyndaǵy óktem báıbishe ǵana emes, eliniń muń-muqtajyn, qaıǵy-qasiretin kóre biletin dana, meıirban ana. Qoıylym rejısseri – QR eńbek sińirgen qaıratkeri Nurqanat Jaqypbaı. Qoıýshy sýretshisi – Berik Býrbaev.
