Elshiniń paıymdaýynsha, keıingi ýaqytta Indonezııada el ortalyǵyn basqa qalaǵa kóshirý máselesi jıi kóterilip júr. Osyǵan sáıkes, elde arnaıy komıssııa qurylyp, zertteý jumystaryn júrgizý tapsyrylǵan.
«Astanaǵa kelgen saparynda Indonezııa vıse-prezıdenti Iýsýf Kalla Elbasydan el ordasyn Almatydan Astanaǵa aýystyrý tájirıbesi jóninde surady. О́ıtkeni, ǵylymı ortada, baspasóz betterinde astanany basqa shaharǵa ne aralǵa aýystyrý jóninde áńgime qozǵaldy. El prezıdenti Ulttyq damý agenttigine sheteldik ozyq tájirıbelerdi jınaqtap, Indonezııa ereksheligin eskere otyryp joba jasaý tapsyrdy», – dedi A.Orazbaı.
Elshi Indonezııanyń mundaı batyl qadamǵa barýyna qazirgi Astana Djakartanyń halyqqa lyq tolýymen baılanystyrady. Qazirgi tańda Indonezııa ortalyǵynda 15 mıllıonǵa jýyq halyq turady. Osy máselelerdi eskere otyryp el astanasyn kóshirýde josparlaǵan Indonezııa úkimeti Qazaqstannyń 1997 jylǵy qadamyn joǵary baǵalap, tájirıbe alýǵa nıetti.
Sonymen qatar, A.Orazbaı Indonezııa vıse-prezıdenti Iýsýf Kallanyń Astanaǵa sapary barysynda talqylanǵan basqa máselelermen de bólisti. Onyń sózine súıensek, eki el de búkil deńgeıdegi qarym-qatynasty nyǵaıtýǵa qarsy emes. Budan bólek, A.Orazbaı elde Islam bank júıesi jaqsy damyǵanyn tilge tıek etti. Osyǵan sáıkes, Qazaqstan tarapy Indonezııamen tájirıbe almasýǵa ázir ekenin jetkizgen. Sondaı-aq, ındonezııalyq Islam bankteri Astanada ashylatyn Halyqaralyq qarjy ortalyǵynda jumys isteýge shaqyrylyp otyr.
A. Orazbaı Indonezııa kásipkerleri Qazaqstanda dári óndiretin farmasevtıkalyq zaýyt salýǵa múddeli ekenin málimdi. Onyń aıtýynsha, eldegi úlken kompanııalardyń biri Rama Group basshylyǵy Qazaqstanǵa saparmen kelip, mundaǵy naryqty zerttep ketipti.
Degenmen, eki el arasyndaǵy saýda jáne ekonomıkalyq qarym-qatynasty damytýǵa transporttyq-logıstıkalyq baılanystyń nasharlyǵy kedergi bolyp otyr. Bıylǵy alǵashqy jarty jyldyqta Indonezııa men Qazaqstan arasyndaǵy taýar aınalymy 15,2 mıllıon dollardy quraǵan. Bul – byltyrǵy merzimmen salystyrǵanda 65,3 paıyzǵa joǵary.
A.Orazbaı saýda jáne ekonomıkalyq baılanysty nyǵaıtýdyń eki baǵytyn atap kórsetti. Onyń pikirinshe, Qytaıdaǵy Lıanıýngan porty arqyly Qazaqstan taýaryn Indonezııaǵa eksporttaýǵa múmkindik bar. Elshi ekinshi baǵyt retinde Irandaǵy Bender-Abbas portyn esepteıdi. Áıtse de, ázirge saraptaý jumystary júrgizilip jatyr. Tıimdi bolǵan baǵyt boıynsha jumys júrgizetinin málimdedi A.Orazbaı.
Indonezııa halqy sany jóninen álemde 4-orynda turǵan memleket. Islam memleketteri arasyndaǵy eń úlkeni jáne demokratııaly el sanalady. Qazaqstan men Indonezııa arasyndaǵy dıplomatııalyq kelisim 1993 jyly 2 maýsymda ornatylǵan.
Abaı ASANKELDIULY,
«Egemen Qazaqstan»
