Sýretter Prezıdenttiń baspasóz qyzmetinen alyndy
– Sanamyzdy jańǵyrtý – qoǵam úshin qaı kezdegiden ótkir másele bolyp tur. Aqparattyq-sıfrly zamanda bir orynda turýǵa bolmaıdy, búgingi talaptar men jaǵdaıǵa sáıkes jetilip, ózgerip otyrý qajet. Adamdarmen birge búkil qoǵam da básekege qabiletti bolýǵa tıis, – dedi Elbasy óziniń sózinde.
Sondaı-aq, Nursultan Nazarbaev Qazaqstan halqy Assambleıasynyń bire-
geıligi men memlekettik tilimizdiń latyn álipbıine kóshýiniń mańyzdylyǵy týraly da aıtyp ótti.
– Men turaqtylyq pen halqymyzdyń birligi damýymyzdyń kepili bolyp tabylatynyn árdaıym aıtyp júremin. Latyn álipbıine kóshý máselesin durys túsingen jón. Til halqymyzdy odan ári biriktirý úshin qyzmet etýi tıis, – dedi Elbasy N.Nazarbaev.
Atalǵan Dostyq úıi Áýlıeata óńirindegi etnos ókilderin bir ortaǵa biriktirgen kıeli shańyraq bolyp sanalady. Ǵımaratty salýǵa memleket qazynasynan 1 mıllıard 277 mıllıon teńge bólinip, maqsatty ıgerilgen bolatyn. Búgingi tańda Jambyl oblystyq Qazaqstan halqy Assambleıasynyń quramynda 175 qoǵamdyq kelisim keńesi, 27 analar keńesi, 12 medıasııa kabıneti, 12 aqsaqaldar keńesi, Qazaqstan halqy Assambleıasynyń kafedrasy, Ǵylymı-saraptamalyq top, qolóner sheberleriniń klýby jáne «Aq jelken» jastar lıgasy jumys isteıdi.
Sondaı-aq, mundaǵy 240 oryndyq májilis zaly, pikirlesýge arnalǵan dóńgelek ústel alańy, 100 adamǵa arnalǵan konferens-zal, ǵylymı-ádistemelik bólmeler, horeografııalyq zal óńirde ıgi sharalar ótkizýde, Elbasy saıasatyn nasıhattaýda oń nátıje kórsetip otyr. Búginde Qazaqstan halqy Assambleıasy etnostyq quram ókilderinen qazaq, orys, dúngen, túrik, ózbek, kúrd, ázerbaıjan, qyrǵyz, koreı, tatar, nemis, ýkraın jáne taǵy sol sııaqty 73 etnomádenı birlestiktiń basyn biriktirip, jumys atqarýda.
Sondaı-aq, Nursultan Nazarbaev oblysqa jumys sapary kezinde qurylys materıaldaryn shyǵarýmen aınalysatyn «KazÝpakTreıd» jaýapkershiligi shekteýli seriktestiginiń zaýytynda boldy. Memleket basshysyna elimizdiń ındýstrııalyq-ınnovasııalyq damý baǵdarlamasynyń óńirdegi oryndalý barysy týraly málimdelip, 557 mıllıard teńgeni quraıtyn 30-dan astam jobanyń júzege asyrylýy josparlanyp otyrǵany jóninde baıandaldy. Osyǵan oraı oblysta 6 myńǵa jýyq jańa jumys orny ashylatyn bolady.
О́z sózinde Elbasy túrli memlekettik jobalar men baǵdarlamalardy iske asyrý nátıjesinde Jambyl oblysy qýatty ındýstrııalyq óńirge jáne elimizdiń hımııa ónerkásibiniń ortalyǵyna aınalýǵa tıis ekenin atap ótti.
О́ńirge jumys sapary barysynda Qazaqstan Respýblıkasynyń Prezıdenti Nursultan Nazarbaev Taraz qalasy Aısha bıbi kóshesiniń jol ótkelindegi qurylys jumystarymen tanysty. Búginde Taraz qalasy turǵyndarynyń jalpy sany 369 myńdy quraıdy. Onyń 100 myńy qala aýmaǵymen ótetin temir jol jelisiniń arǵy betinde turady. Qazirgi tańda qalanyń osy eki bóligi arasynda kólik qatynasy Abaı kóshesinde ornalasqan jalǵyz jol ótkeli arqyly júrgizilip keledi.
Aıta keteıik, sońǵy jyldary oblysta kólik qozǵalysynyń qarqyndylyǵy 2-3 esege ósip, qalanyń temir joldyń arǵy betindegi bóligimen qatynas ornatý qıyndap ketken bolatyn. Oǵan qosa, Qyrǵyz Respýblıkasynyń shekarasy men «Aısha bıbi» keden beketi baǵytynan qatynaıtyn kólik qozǵalysynyń qarqyndylyǵy táýligine 4-5 myń avtokólikke jetken edi. Atalǵan máseleniń sheshimin tabý maqsatynda qurylysy ótken ǵasyrdyń toqsanynshy jyldary bastalyp, aıaqtalmaı qalǵan Aısha bıbi kóshesiniń aıaǵynda ornalasqan jol ótkelin jańǵyrtý jobasy qolǵa alyndy. Nátıjesinde qaıta jańǵyrtýdan ótken jol ótkeli paıdalanýǵa berilip, qalanyń temir joldyń arǵy betindegi bóligimen baılanys ońtaılana tústi.
Memleket basshysy Jambyl oblysyna sapary barysynda óńir jurtshylyǵymen kezdesti. Oǵan eńbek sińirgen ardagerler, shyǵarmashyl zııaly qaýym ókilderi, bilim jáne ǵylym salasynyń qyzmetkerleri, ónerkásiptik kásiporyndardyń jumysshylary, stýdent jastar, kásipkerler, qoǵamdyq uıymdar men etnomádenı birlestikterdiń jetekshileri qatysty.
Qazaqstan Prezıdenti óńirdiń hımııa ónerkásibin damytý salasyndaǵy áleýeti zor ekenin aıtyp, ındýstrııalyq jáne ınfraqurylymdyq baǵdarlamalardy tıimdi iske asyrýdyń mańyzdylyǵyna toqtaldy.
– Hımııa salasy oblystyń búkil ónerkásip óndirisiniń 20 paıyzdan astamyn quraıdy. Indýstrııalandyrý baǵdarlamasy arqyly óńirde 53 joba iske asyryldy. Osy maqsatpen 158 mıllıard teńge kóleminde ınvestısııa tartylyp, 7 myńǵa jýyq jumys orny ashyldy. «Batys Eýropa – Batys Qytaı» halyqaralyq avtojoly salyndy. Qarataý men Jańatas qalalaryna edáýir qoldaý kórsetildi. Jalpy, júzege asyrylyp jatqan barlyq baǵdarlamalar halyqtyń ál-aýqatyn arttyrýǵa baǵyttalǵan, – dedi Nursultan Nazarbaev.
Sonymen qatar Elbasy óńirdiń agrarlyq sektoryn damytý perspektıvalary jóninde de aıtty.
– Aýyl sharýashylyǵynda 34 joba iske asyryldy. Onyń jalpy quny 8 mıllıard teńgeni quraıdy. Tek sońǵy 3 jylda oblystaǵy aýylsharýashylyq taýar óndirýshilerine berilgen memlekettik sýbsıdııa 35 mıllıard teńgeden asty, – dedi Memleket basshysy.
Qazaqstan Prezıdenti halqymyzdyń birligi men memleketimizdiń turaqtylyǵy el damýynyń negizgi faktory bolyp sanalatynyn aıtty.
– Munyń bári – barsha qazaqstandyqtar birliginiń, kelisimi men dostyǵynyń, qoǵamdaǵy turaqtylyqtyń nátıjesi. Bizdiń bitimger memleket atanǵanymyz beker emes, – dedi Nursultan Nazarbaev.
Sondaı-aq Elbasy sheshimin tappaı turǵan birqatar máselelerge toqtaldy.
– О́ńirdiń áleýmettik damý kórsetkishteri tómen. Jalpy, oblystyń ónerkásiptik áleýeti de tolyqtaı ashylmaı otyr. «Jibek joly» ekonomıkalyq beldeýin damytý barysynda 5 jobany iske asyrý kózdelgen. Biraq búgingi kúnge deıin birde-bir joba iske qosylmaǵan, – dedi Memleket basshysy.
Qazaqstan Prezıdenti qazirgi ýaqytta zamanaýı hımııa klasterin qurý jónindegi jumystardyń atqarylyp jatqanyn atap ótti. Sonymen birge kóptegen joba tolyq qýatymen jumys istep jatqan joq. Gazben qamtamasyz etý, avtomobıl jáne temir joldaryn salý sııaqty ınfraqurylym máseleleri sheshilmegen.
– Al Qarataý men Jańatas qalalaryndaǵy jobalardy jáne «Hımpark-Taraz» arnaıy ekonomıkalyq aımaǵyn iske qosý arqyly oblystyń ónerkásip óndirisiniń kólemin edáýir arttyrýǵa bolatyn edi, – dedi Nursultan Nazarbaev.
Memleket basshysy jıynǵa qatysýshylardyń nazaryn oblys turǵyndaryn nátıjeli jumyspen qamtý máselesiniń sheshilmeı otyrǵanyna aýdardy.
– О́zin ózi jumyspen qamtý ózekti máselege aınaldy. Búginde ekonomıkalyq turǵydan belsendi 523 myń adamnyń 44,6 paıyzy – ózin ózi qamtyǵandar. Bul – respýblıka boıynsha eń tómen kórsetkish. О́zin ózi qamtyǵandarǵa kelsek, olar barlyq elde bar. Másele bul adamdardyń, birinshiden, ónimdi jumyspen qamtylýynda, ekinshiden, ashyq, zańdy túrde jumys isteýinde, – dedi Qazaqstan Prezıdenti.
Sondaı-aq Nursultan Nazarbaev shaǵyn jáne orta bızneske arnalǵan ınfraqurylym damýynyń jetkiliksiz ekenin aıtty.
– Shaǵyn jáne orta bızneste jumyspen qamtylǵan halyqtyń nebári 24 paıyzy jumys isteıdi. Bıznespen aınalysý jaǵdaılaryn jaqsartý úshin naqty sharalar qabyldaý qajet. Bolashaq iri kásiporyndardyń emes, shaǵyn jáne orta bıznestiń qolynda. Naryqtyń syn-tegeýrinderin birden baıqap, jedel qaıta mamandanýǵa beıim turatyny da osy shaǵyn jáne orta bıznes, – dedi Memleket basshysy.
Qazaqstan Prezıdenti agrarlyq salanyń áleýeti jetkilikti túrde tıimdi paıdalanylmaı otyrǵanyn atap ótti.
– Agrarlyq sektor ekonomıkanyń jáne shıkizattyq emes eksportty ósirý draıveri bolýǵa tıis ekenin aıtqanmyn. Oblysta bul saladaǵy eńbek ónimdiliginiń kórsetkishi tómengilerdiń biri bolyp otyr. Al osyndaı kórsetkish Qaraǵandy, Soltústik Qazaqstan, Shyǵys Qazaqstan oblystarynda edáýir joǵary. Oblysta jer ýchaskeleriniń kóp bóligi tıimdi paıdalanylmaı keledi. Olardy otbasylyq ferma retinde paıdalaný úshin tıisti jumystar júrgizý qajet, – dedi Nursultan Nazarbaev.
Sodan soń Nursultan Nazarbaev qoǵamdyq sanany jańǵyrtýǵa arnalǵan «Bolashaqqa baǵdar: rýhanı jańǵyrý» atty aýqymdy baǵdarlamany sapaly iske asyrý qajettigine toqtalyp, onyń Qazaqstannyń jahandyq básekege qabilettiligin arttyrýdaǵy mańyzdylyǵyn atap ótti.
Sońynda Nursultan Nazarbaev jıynǵa qatysýshylardyń barlyǵyna jaqsylyq, baq-bereke men sáttilik tiledi.
Dınara BITIK,
Hamıt ESAMAN,
«Egemen Qazaqstan»
Jambyl oblysy
