Desekte,jobaǵa qatysýǵa nıetti jastardyń sany jyldan jylǵa artyp keledi. Osyǵan baılanysty jobaǵa bólinetin grant sanyn keminde 5 myńǵa kóbeıtý kózdelip otyr. Búgin bul týraly oblys ákimi J. Túımebaevtyń tóraǵalyǵymen ótken selektorlyq otyrysta oblystyq jastar saıasaty máseleleri basqarmasynyń basshysy Balmarjan Narbekova málim etti.
Elimizde jastardyń sapaly bilim alýyna mol múmkindik berip otyrǵan «Serpin-2050» jobasy Elbasymyz Nursultan Ábishulynyń tapsyrmasymen 2014 jyldan beri júzege asyrylyp keledi. Atalǵan jobanyń maqsaty - jastardy halqy az qonystanǵan jáne eńbek kúshin qajet etetin soltústik aımaqtardaǵy joǵary jáne kásiptik-tehnıkalyq oqý oryndaryna ornalastyrý jáne jumyspen qamtý. Jalpy jobaǵa 14 oblys qatyssa, onyń ishinde 9-y qabyldaýshy, al, 5-ýi jiberýshi óńir.
«Jobaǵa elimizdegi 133 joǵary oqý oryndarynyń arasynan 25 joǵary oqý oryndarynda pedagogıkalyq 15 mamandyq, tehnıkalyq 14, aýylsharýashylyǵy 9, veterınarııa 2 mamandyq boıynsha talapkerler qabyldaýda. Mamandyqtardyń jalpy sany 40-qa jýyqtaıdy. Jobaǵa qatysýshy árbir talapkerlerge barlyq áleýmettik jeńildikter qarastyrylyp, stýdentter úshin barlyq materıaldyq-tehnıkalyq bazamen tolyqtaı jabdyqtalǵan», - dedi Balmarjan Polatqyzy.
Atalǵan joba aıasynda oblysymyzdaǵy «Jastar resýrstyq ortalyqtary» aýyldyq jerlerdegi 800-ge jýyq jalpy bilim beretin mektepterdegi bitirýshi túlektermen kezdesýler uıymdastyrylǵan. Nátıjesinde pedagogıkalyq mamandyqtar boıynsha 12 joǵary oqý orynyna, tehnıkalyq, aýylsharýashylyǵy jáne veterınarııa mamandyqtary boıynsha 22 joǵary oqý oryndaryna 8 myńǵa jýyq talapkerlerden qujattar qabyldanyp, ulttyq testileý ortalyǵyna joldanǵan.
«Elimizdegi «Serpin-2050» jobasy tegin bilim alýǵa úlken múmkindik beredi. Bul baǵdarlamanyń saıası mańyzdylyǵyn aýdan, qala basshylary jaqsy túsinip, úgit-nasıhat jumystaryn jandandyrýy qajet. «Serpin -2050» jobasy men halyqty soltústikke óz erkimen kóshirý baǵdarlamasyn biriktirý máselesin oılastyrǵan jón. Ol úshin monıtorıng jumystaryn jandandyryp, naqty usynystar ázirlensin», - dedi Janseıit Qanseıituly.
Jıyndy qorytyndylyǵan óńir basshysy ońtústikten soltústikke kóship barǵan otbasylardyń balalaryn da «Serpin» jobasymen bilim alýyna yqpal etip, jumyspen qamtý máselesin nazarǵa alýdy tapsyrdy.
