Qarjy mınıstri Baqyt Sultanov bıyl 8 aıdaǵy bıýdjettiń atqarylýy ekonomıka ósimi jaǵdaıynda qamtamasyz etilgenin baıandady. Ekonomıka salalaryn damytýdyń oń nátıjeleri memlekettik bıýdjettiń kiris bóliginiń atqarylýyna aıtarlyqtaı áser etti.
Aǵymdaǵy jospardy oryndaý boıynsha, sondaı-aq ótken jyldyń uqsas kezeńine ósý qarqyny boıynsha da oń trend baıqalýda. Mysalǵa, memlekettik bıýdjettiń kiristeri (transfertterdi eseptemegende) ótken jylmen salystyrǵanda 366,9 mlrd teńgege nemese 108,9% ulǵaıdy. Onyń 172,2 mlrd teńgesi respýblıkalyq bıýdjetke, al 195,2 mlrd teńgesi jergilikti bıýdjetterge tıesili.
Bul faktor qarjy sektoryn qoldaýdyń qosymsha kózderin paıdalaný jáne jalpy sıpattaǵy transfertterdi qaıta qaraýmen birge memlekettik bıýdjet shyǵyndary ósiminiń ótken jyldyń uqsas kezeńimen salystyrǵanda shamamen 3 trln teńgege nemese 47,6% ósýine alyp keldi.
Jalpy bıyl 8 aıda memlekettik bıýdjetke (transfertterdi eseptemegende) 4 512,3 mlrd teńge kólemde kirister kelip túsken. Asyra oryndaý 194,5 mlrd teńgeni nemese eseptik kezeńdegi jospardyń 104,5% qurady.
Respýblıkalyq bıýdjet boıynsha aǵymdaǵy jospar 102,2% oryndaldy. 3 083,4 mlrd teńge (3 016 mlrd teńge jospar kezinde) jınaldy, asyra oryndaý 67,4 mlrd teńgeni qurady. Jalpy barlyq túsimder boıynsha ótken jylmen salystyrǵanda aıtarlyqtaı ósim baıqalyp otyr.
Jergilikti bıýdjetterdiń kiristeri 1 429,7 mlrd teńgeni qurady. Bul eseptik kezeńdegi jospardyń 109,8% (asyraý oryndaý somasy 127,8 mlrd teńge).
Memlekettik bıýdjet shyǵyndary 9 021,7 mlrd teńgeni nemese eseptik kezeńdegi jospardyń 97,7 % qurady. Bıyl 8 aıda respýblıkalyq bıýdjet shyǵyndary 7 982,6 mlrd teńgege nemes eseptik kezeńdegi jospardyń 98,6% ıgerildi. Jergilikti bıýdjetterdiń shyǵyndary 3 023 mlrd teńge somasynda nemese eseptik kezeńdegi jospardyń 96,7% atqaryldy.
«Nurly jol» memlekettik baǵdarlamasy boıynsha 8 aıda 272,7 mlrd teńgege nemese eseptik kezeńdegi jospardyń 99,9% ıgerilgeni jeke atap ótildi. Qarajat kólik-logıstıkalyq jáne ındýstrııalyq ınfraqurylymdy damytýǵa, TKSh jańǵyrtýǵa, sý jáne jylýmen qamtý jáne sý burý jelilerine, bilim berý salasyndaǵy ınfraqurylymdy damytýǵa baǵyttalǵan.
