Memlekettik hatshy bıyl Qazaqstan men Japonııa arasynda dıplomatııalyq baılanys ornaǵanyna 25 jyl tolǵanyn atap ótti. G.Ábdiqalyqova ózara qarym-qatynasynyń strategııalyq sıpatyna toqtaldy. Onyń pikirinshe, eki el basshylarynyń turaqty kezdesýleri dıplomatııalyq baılanystyń joǵary deńgeıin kórsetedi.
Sonymen qatar, G.Ábdiqalyqova parlamentaralyq baılanystyń damýyna K.Takemıdiń qosqan úlesin atap ótti. Ol densaýlyq saqtaýdyń strategııasyn ázirleý, parlamentarııler arasyndaǵy dıalogtyń órbýi jáne áıelderdiń quqyǵyn qorǵaý máselelerinde Qonystaný jáne damý jónindegi forýmdy tájirıbe almasatyn mańyzdy alań dep sıpattady.
Memlekettik hatshy Qazaqstandaǵy 2030 jylǵa deıingi otbasylyq jáne genderlik saıasat tujyrymdamasynda belgilengen áıelderdiń quqyqtary men múmkindikterin nyǵaıtý salasynda elimizdiń dáıekti saıasat júrgizip otyrǵanyna toqtaldy. Onyń aıtýynsha, búgingi tańda elimizde kásipkerlerdiń 50 paıyzy názik jandylardan quralǵan. Basqarýshy qyzmettegilerdiń 40 paıyzy áıelder qaýymynan ekenin de sóz etti memlekettik hatshy.
«Áleýmettik jáne ekonomıkalyq jetistikter men damýdyń jańa deńgeıine salaly kóshýiniń arqasynda Qazaqstan búginde kómekke asa muqtaj elderdiń, onyń ishinde Aýǵanstan men Azııa-Tynyq muhıt aımaǵy memleketteriniń damýyna járdemdesý jáne kómekti ulǵaıtý múmkindikterin qaıta qarastyryp jatyr. Osyǵan oraı, BUU damý baǵyty jáne Japonııa Syrtqy ister mınıstrligi birlesip, «Damýǵa resmı kómek kórsetý salasyndaǵy Aýǵanstanmen yntymaqtastyq boıynsha Qazaqstanǵa járdemdesý» atty jobalyq qujat ázirledi», – dedi Memlekettik hatshy.
Kezdesý barysynda G.Ábdiqalyqova Qazaqstan men Japonııanyń BUU Qaýipsizdik keńesine turaqty emes múshe bolyp saılanǵanyn tilge tıek etip, eki el arasyndaǵy seriktestikti nyǵaıtýda munyń qosymsha múmkindikterge jol ashatynyn jetkizdi.
О́z kezeginde K.Takemı Qazaqstannyń álemge damýdyń zamanaýı úlgisin kórsetetinin jetkizdi.
«Qazaqstanǵa kelgendegi basty maqsatym – forým jumysyn tanystyrý bolatyn. Sapar barysynda Premer-mınıstr Baqytjan Saǵyntaevpen jáne Májilis tóraǵasy Nurlan Nyǵmatýlınmen kezdestim. Bizdiń forýmnyń basty úsh baǵyty bar: qoǵamdaǵy áıelder rólin arttyrý, jastarǵa ınvestısııa salý jáne qoǵamnyń ómir súrý merzimin ulǵaıtý», – degen K.Takemı Qazaqstannyń forýmǵa kóńil bóletininen úmitti ekenin habarlady.
Aıta ketý kerek, Jıynǵa Májilis tóraǵasynyń orynbasary Gúlmıra Isımbaeva da qatysty. Kezdesý sońynda G.Ábdiqalyqova K.Takemıdiń Qazaqstandaǵy saparyna tabys tilep, Qazaqstan men Japonııa baılanysynyń budan ári bekı túsetinine senim bildirdi.
Abaı ASANKELDIULY,
«Egemen Qazaqstan»
