Eńbek jáne halyqty áleýmettik qorǵaý mınıstri Tamara Dúısenova ınvestısııalyq ahýaldy jaqsartý maqsatynda aǵymdaǵy jyly eńbek kóshi-qonyna qatysty Qazaqstannyń kóshi-qon zańnamasyna ózgerister engizilgenin baıandady.
2017-2021 jyldarǵa eseptelgen Kóshi-qon saıasaty tujyrymdamasynyń negizgi strategııalyq maqsattary elimizdiń óńirleriniń demografııalyq jáne ekonomıkalyq teńgerimdiligin jaqsartý; ýaqytsha jáne uzaq merzimdi kóshi-qondy paıdalaný negizinde bilikti mamandardyń ashyq naryǵyn qalyptastyrý; kóshi-qonmen baılanysty qaýip-qaterler turǵysynan eldiń ulttyq qaýipsizdigin qamtamasyz etý bolyp aıqyndaldy.
«Barlyq úsh strategııa ózara táýeldi jáne kóshi-qon saıasatynyń júıeliligin qamtamasyz ete otyryp, syrtqy, ishki jáne etnıkalyq kóshi-qondy retteýdiń mazmundy negizin quraıdy», — dep atap ótti T. Dúısenova.
Kóshi-qon saıasatyn damytýdyń aldaǵy strategııasyn anyqtaýda EYDU elderiniń tájirıbesi paıdalanyldy, onda kóbine uzaq merzimdi nemese gıbrıdtik kóshi-qon paıdalanylady. Bul ekonomıkanyń ınnovasııalyq sektorlaryna bilikti mamandardy tartýǵa jáne iskerlikti damytýǵa múmkindik beredi. Belgili bir shyǵyn jumsalatynyna qaramastan mundaı saıasat naryqtyq ekonomıkaǵa qajetti «qaýipsizdik kópshigi» bolady, dep basa aıtty vedomstvo basshysy.
«Usynylǵan túrlendirýler zańsyz kóshi-qon aǵymdaryn shekteýge, bilikti mamandardy tartý tetigin odan ári yryqtandyrýǵa, eńbek mıgranttaryn yqpaldastyrý úshin jaǵdaı jasaýǵa baǵyttalǵan», — dep túıindedi T. Dúısenova.
О́z kezeginde ishki ister mınıstri Qalmuhanbet Qasymov sońǵy jyldary Qazaqstanda jaǵymdy ınvestısııalyq ahýal qalyptasyp kele jatqanyn, 60-tan astam elderdiń azamattaryna vızasyz rejım bekitilgenin, olardy elde tirkeý rásimi jeńildetilgenin, eńbek kóshi-qony úshin ákimshilik kedergiler qysqarǵanyn, biraq sáıkesinshe qaýip-qater, onyń ishinde transulttyq qylmystyqtyń artyp kele jatqanyn baıandady.
Osyǵan baılanysty Tujyrymdamada polısııa júzege asyratyn kóshi-qon baqylaýyn odan ári jandandyrý jáne jetildirý qarastyrylǵan. Atap aıtqanda, Tujyrymdama jobasynda eldegi quqyqtyq bazany jáne kóshi-qon baqylaýy júıesin damytý, zańsyz kóshi-qonnyń uıymdastyrylǵan arnalaryn bultartpaý, eńbek mıgranttaryn aldaǵy «kóleńkeden» shyǵarý, sondaı-aq halyqaralyq yntymaqtastyqty jalǵastyrý jáne readmıssııa týraly kelisim jasaý qarastyrylǵan.
Talqylaýdy qorytyndylaı kele, Baqytjan Saǵyntaev aıtylǵan eskertýlerdi eskere otyryp, Tujyrymdamany jetildirýdi jáne Úkimettiń bekitýine engizýdi tapsyrdy.
