Bilim jáne ǵylym vıse-mınıstri Bıbigúl Asylovanyń aıtýynsha, jańa pándi engizýge daıyndyq jumystary eki jyl buryn bastalǵan bolatyn. Osy ýaqyttyń ishinde birlesken sharalar jospary men arnaıy oqý baǵdarlamasy ázirlendi.
«Atalǵan pándi kelesi jyldan bastap barlyq mektepterde engizý týraly sheshim qabyldandy. Oǵan 2 saǵat ýaqyt bólinedi. Alaıda oqýshylar ol pándi meńgere me, joq pa, ony ózderi sheshedi. 10-11 synyp oqýshylary kásipkerliktiń alǵashqy negizderin ıgere alady. Sóıtip, naryqtyq zamanǵa qajetti qarim-qabiletterdi qalyptastyrý jumysy mektepten bastap qolǵa alynady», dedi Asylova búgin Astanada ótken baspasóz máslıxatynda.
Qazirgi josparǵa sáıkes, jańa oqý jylyna deıin barlyq muǵalimder qaıta daıarlaý kýrstarynan ótedi. Oǵan deıin "Kásipkerlik jáne bıznes negizderi» atty oqýlyq ta basylyp shyǵady.
«Atameken» ulttyq kásipkerler palatasy basqarma tóraǵasynyń orynbasary Eldar Jumaǵazıevtiń oıynsha, jańa oqýlyqtyń elektrondy nusqasy da bolýy shart. Sebebi qazirgi jastar ǵalamtorda jıi otyrady. Oǵan qosa, bıznestiń basymdyqtary zaman talabyna saı ózgerip turady. Osyǵan baılanysty jańa pánniń baǵdarlamasyn únemi jańartyp otyrý qajet.
«Bizdiń esebimizge sáıkes, eki jyldyń ishinde 68 sabaqty meńgerip shyǵý qajet. Bálkim, bir sabaqqa tanymal bir bıznesmen jaýap beredi. Ondaı adamdar óz tájirıbesimen bólisip, kásipkerlikti júrgizýdiń qyr-syryn ashyp berse eken deımiz. Mektepti bitirgende árbir oqýshy bir-bir bıznes jobany usynady. Kim biledi, sonyń ishinde úzdik startaptar bolatyn shyǵar», deıdi Jumaǵazıev.
