Sebebi, elorda komandasy óziniń negizgi lıderlerisiz-aq úsh kezeńniń jeńimpazy atandy. Al onyń bireýi qazaqstandyq jas shabandoz Alekseı Lýsenkonyń enshisinde ekenin eskersek, bul jolǵy grand týrdy sátti ótti deı alamyz. Alǵashynda Alekseı kezeń jeńimpazy atandy degendi estigende óz kózimizge ózimiz senbep edik. Alaıda, ol jastar arasyndaǵy álem chempıony, talaı dodalarda júlde alyp júrgen talant ekenin de eskergenimiz jón. Degenmen, grand týrdyń orny bólek. Osylaısha, ol iri dodany jeńgen tórtinshi qazaqstandyq shabandoz atandy. Dál Ispanııadaǵy «Výelta» kópkúndigin oǵan deıin tek Aleksandr Vınokýrov qana jeńgen bolatyn.
Qazaqstannan barǵan bir top jýrnalıster Ispanııa týrynyń 18-kezeńinde qyzmet ettik. Osy kezeńde máre syzyǵyna 600 metr qalǵanǵa deıin top bastap kele jatqan Alekseı Lýsenko sharshaǵanyn bildirtip aldy. Áıtpegende ekinshi márte jeńimpaz atanar edi. Sander Armı degen belgııalyq qarsylasy Lýsenkonyń sál kesheýildep qalǵanyn dál baıqasa kerek, taýǵa qaraı órmeleı jóneldi. Áıtse de, kúlli álemge taralyp jatqan telekórsetilim barysynda qazaqstandyq shabandoz bizdiń eldi birshama tanytyp tastady. Endi budan bylaı Alekseıdi velosport álemi myqtylar qataryna qosyp, lıderler sanatyna jatqyza da jatar. Árıne, sonshylyqty grand týr jeńetin deńgeıge ol áli jete qoıǵan joq. Tek aragidik osylaı kezeńdi baǵyndyryp, kerek kezinde komanda kapıtandaryna qyzmet ete alady. Bul – eń bastysy. Sebebi, túgelimen jarysty jeńý – tek sanaýly adamdardyń ǵana qolynan keledi. Mysaly, Alekseı Krıstofer Frým Alberto Kontadordyń ózine adym ashtyrmady. Qarsylastaryna shań qaptyrdy da júrdi. Brıtanııanyń «Sky» komandasy kapıtany sońǵy 3-4 jyl boıy eshkimge des bermeı keledi. Bálkim, ol eki nemese úsh jyldan keıin dopıngpen ustalatyn da shyǵar dep júrgender de joq emes. Al kóp mamandar Krıstiń tegi tegin emes deıdi. Ájesi kenııalyq bolǵandyqtan, onyń jelaıaqtyǵy naǵashy jaqtan tarapty-mys. Árıne, bul tujyrymmen kelispeske amal joq. Qazaqta «bolar bala naǵashydan» deıdi ǵoı. Kim bilsin, bálkim esh dárý-dármeksiz de myqty shyǵar. Bizde ázirge shák keltiretin eshqandaı dálel joq. Frým – osy kúngi velosport áleminiń qaharmany. Ony jeńý qıynnyń qıyny.
«Astana» komandasynyń sporttyq dırektory Dmıtrıı Sedýn bir áńgimesinde taǵy bir qýanyshtyń shetin shyǵardy. «Bir jarysta Mıgel Lopes ekinshi oryn aldy. Bul shabandozdy biz bolashaqta komandany kúsheıtýi múmkin dep alǵan edik. Basynda klýbqa jańadan kelgen kolýmbııalyqqa asa qatty mán bermeı júrgenbiz. Sóıtsek, bul balamyz naǵyz talant eken. Men bir jarys aıaqtalǵannan keıingi protokolǵa «Bizdiń komandada jańa talant, myqty fenomen bar», dep jazdym. Bul sózimnen esh uıalmadym. Boljamym dál keldi», dep aqtaryldy Sedýn myrza. Iá, rasymen de onyń aıtqany aıdaı kelipti. Mıgel Anhel Lopes Ispanııadaǵy dodada eki birdeı kezeńniń jeńimpazy atandy. Bir qyzyǵy, bul shabandoz velosportty 16 jasynan bastaǵan. Oǵan deıin atalǵan sport túrimen arnaıy shuǵyldanbapty. Kolýmbııanyń taýly aımaǵynda turatyn Mıgel mektepke velosıpedpen baryp-kelip júripti. Al onyń mektebi teńiz deńgeıinen 2000 metr bıiktikte ornalassa kerek. Iаǵnı, taýly jerde shaıtanarba tebýde esh qıyndyq joq. Bala kezden bergi mashyqtanyp júrgeni bar. Bul árıne, bolashaqta aty ańyzǵa aınalatyn sportshyǵa tán oqıǵa. О́zderińiz biletindeı, álgi ataqty kolýmbııalyq Naıro Kıntananyń da ǵumyrbaıany osylaı emes pe?! Mıgeldiń túbi top jaryp, myqtylar qataryna qosylýy ýaqyt enshisindegi suraq bolǵan. Mine, osy jolǵy «Výeltada» biz soǵan kóz jetkizdik. Endi jaqyn aradaǵy jarystarda bizdiń komandada úshinshi lıder paıda bolady degen sóz. Alǵashqysy – Fabıo Arý, ekinshisi – Iаkob Fýlsang, al úshinshisi – Mıgel Anhel Lopes.
Jaqyn aradaǵy jarystar demekshi, endi «Astana» komandasy Norvegııanyń Bergen qalasynda ótetin álem chempıonatyna qatysady. Velosporttyń bir ereksheligi de sonda. Komanda ekige, tipti keıde úshke bólinip, jahannyń ár qıyrynda jarysyp jatady. Ispanııada «Výelta» bolyp jatqan shaqta Kanadada taǵy bir iri týrnır ótti. Ol jaqta da «Astana» jeıdesin kıgen shabandozdar júlde saldy. Komanda menedjerleri de jarystan jarysqa kúntizbe boıynsha tynbaı daıyndalyp júr. «Výeltada» komanda tizginin Jambyl jerinen shyqqan Aleksandr Shefer men Dmıtrıı Sedýn ustady. Sońyna qaraı Aleksandr Vınokýrov qosylyp, shabandozdarǵa shabyt berdi. Eń sońǵy 21-shi kezeń Ispanııa astanasy Madrıdtiń basty alańynda ótti. Otandastarymyz komandalyq esepte birinshi oryn alyp, marapattaý rásimine shyqty. Kúlli Eýropa, jalpy velosport súıer qaýym «Astanaǵa» qyzyǵa hám qyzǵana qaraǵany anyq. Sebebi, bul komanda quramy talantty jastardan turady.
Ermuhamed MÁÝLEN,
jýrnalıst
Arnaıy «Egemen Qazaqstan» úshin Ispanııadan
