«Bizdiń ortalyq jyldyń sońyna deıin birneshe jobany iske asyrǵaly jatyr. Sonyń ishindegi eleýli jumystardyń biri - Qazaqstannyń kıeli jerleriniń ensıklopedııasyn jaryqqa shyǵarý. Jalpy baǵdarlamanyń ózi ózderińizge málim, 2017-2021 jyldarǵa arnalǵan. Sondyqtan, ár jyly ensıklopedııanyń bir-bir tomyn shyǵaramyz degen josparymyz bar. Sonyń bıylǵy tomy Astana qalasy, Aqmola men Almaty oblysyna arnalǵan. Qazir arnaıy top qurylyp, jumys bastalyp ketti. Mine, Astana men Almaty qalalary boıynsha top jetekshileri bekitildi. Bir-eki aıda osy jumysty bitirsek, alǵashqy bolyp, Qazaqstannyń qasıetti jerleriniń ensıklopedııasynyń birinshi tomy shyǵady. Sonymen qatar, bıylǵy jyldyń aıaǵyna deıin qasıetti jerler týraly rolıkter taratylady. Atap aıtqanda, nelikten ol jer qasıetti, nesimen erekshelenedi - bizdiń jobanyń basty maqsaty osy suraqtarǵa jaýap izdeıdi. Ańyzdardyń syryna úńilýge tyrysamyz», - deıdi Berik Ábdiǵalı OKQ-da ótken baspasóz máslıhaty barysynda.
Eske sala ketsek, búgin «Qasıetti Qazaqstan» ǵylymı-zertteý ortalyǵynyń jetekshisi Berik Ábdiǵalı «Rýhanı jańǵyrý» baǵdarlamasyn júzege asyrý maqsatynda Qazaqstannyń kıeli jerlerin anyqtaý jumysy júrgizilip jatqanyn málimdegen bolatyn. Búgingi kúnge deıin elimizde jalpyulttyq deńgeıdegi 100 jáne jergilikti mańyzy bar 500 kıeli oryn tańdalyp alynyp, olar arnaıy tizim jobasyna engizilgen.
