Tatýlyq pen turaqtylyq – qoǵam ómiriniń irgetasy, osy eki uǵym ornyqqan elde damý bar, órkendeý bar. Táýelsizdik alǵannan keıin bar bolǵany 25 jyl ótkende Qazaqstannyń álemniń ozyq damyǵan 30 memleketiniń qatarynda bolýǵa umtylýy, birqatar ekonomıkalyq kórsetkishter boıynsha qazirdiń ózinde bul mejege jetýi – eń aldymen osy tatýlyq pen turaqtylyqtyń arqasynda. Bul rette Elbasymyz, Qazaqstan halqy Assambleıasynyń Tóraǵasy N.Á.Nazarbaev júrgizip otyrǵan etnosaıasattyń arqasynda respýblıkamyzda ekonomıkalyq turaqtylyq pen ultaralyq kelisim ornyqty dep aıta alamyz.
Qazaq jerindegi tatýlyq pen turaqtylyqtyń tamyry tereńde jatyr. Bizdiń halqymyz qýǵyndalǵan, japa shekken myń san adamdy baýyryna basyp, óziniń qanshalyqty keń peıildi, beıbit nıetti, meıirban el ekenin álemge pash etti. Endi álem halqy osyndaı «ǵajaıyp eldi» kórýge qushtar. EKSPO-ǵa kelgen, Assambleıa ótkizgen is-sharalarǵa qatysqan qonaqtar solaı deıdi.
German Býndestagynyń depýtaty, federaldyq úkimettiń qonys aýdarýshylar men az ulttar isteri jónindegi ýákili H.Koshık, Reseı nemisteri odaǵynyń federaldyq tóraǵasy V.Aızenbraýn, Konrad Adenaýer qorynyń Qazaqstandaǵy ókildiginiń dırektory T.Helm, Polsha prezıdenti Andjeı Dýdanyń jubaıy Agata Kornhaýser-Dýda, taǵy basqalar etnomádenı birlestikter qyzmetimen tanysyp, áser alyp, kókeılerine kóptegen oı túıgenderin aıtty.
EKSPO kórmesi aıasynda N.Nazarbaevtyń qoǵamdyq kelisim men jalpyulttyq birliktiń qazaqstandyq modelin tanystyrýǵa arnalǵan is-sharalardyń túrli formatta ótkizilýi – bizdiń elde qoǵamdyq kelisim ómirdiń bar salasynda tabıǵı túrde qalyptasqan qubylys ekenin tanytý úshin utymdy oılastyrylǵan amal. Aıtalyq, ótken jeksenbide, Beıbitshilik pen kelisim saraıynda Qazaqstan halqy Assambleıasynyń uıymdastyrýymen «Biz – Qazaqstan halqymyz» atty festıval ótti.
Táýelsizdigimizdiń alǵashqy kúnderinen-aq qoǵamda ultaralyq jáne konfessııaaralyq kelisimdi ornatýdy basty baılyǵymyz dep jarııa etken Elbasy osy ustanymnyń berik ornaýyn talap etti. Búginde qazaq eliniń baıtaq jeri ózge ult ókilderi úshin biregeı shańyraqqa aınaldy. Olar Qazaqstandy «Otanym» dep tanysa, ana tilimizde án shyrqasa – bul eń aldymen qazaqtyń mereıi emes pe!
Bir jaqsysy, festıvaldyń ár nómirinen elimizdegi memlekettik tildi ıgerý saıasaty kórinis taýyp jatty. Tatarsha, oryssha, uıǵyrsha aıtylǵan ánderdiń ózinde memlekettik tildegi mátinge basymdyq berilgen. Basqa etnostar ókilderiniń qazaqtyń ulttyq aspaptarynda oınaýy da burynǵy jyldarǵa qaraǵanda kóbirek boldy. Al «Ahysqa» túrik etnomádenı birlestiginiń múshesi Sabyr Gýseınov dombyrada ózi shyǵarǵan «Úshqońyr» aspaptyq kompozısııasyn oryndap, kórermen yqylasyna bólendi.
Aqtóbelik «Veilchen» nemister hory «Aqtóbem» ánin, «Tavros» armıan etnomádenı birlestiginiń ánshisi Lıana Plýzıan «Atyraý-arman» ánin, ózbek ónerpazy Nodır Halmetov «Shymqala» ánin, koreılerdiń «Chen-rıý» etnomádenı birlestiginiń hory «Astana keshi» ánin qazaq tilinde oryndaýy jınalǵandarǵa erekshe áser etti.
Jambyl oblysyndaǵy dúngen etnomádenı birlestiginen kelgen «Iýnchı» dombyrashylar trıosynyń oryndaýyndaǵy «Kóne Taraz» kompozısııasy eshkimdi beıjaı qaldyrmady. Kúmbirlegen dombyra úni men kúmbezdi saraılardy, kerýen kóshin kórsetken beınebaıan ushtasyp, zaldyń ishin ejelgi dáýirden jetkendeı sıqyrly áýen baýrap aldy. Degenmen, pavlodarlyq «Halkanbart» cheshen-ıngýsh etnomádenı birlestiginiń «Illı» vokaldyq toby men «Daımohk» horeografııalyq ansambli festıvaldyń kórki boldy desek, asyra aıtqanymyz emes.
Sheteldik qonaqtarymyz festıval arqyly Qazaqstan halqynyń birligi men mádenı áralýandyǵynyń erekshelikterin tanysa, qala turǵyndary, óz otandastarymyz ádemi án tyńdap, sergip, «Biz – Qazaqstan halqymyz» dep serpilip qaıtty.
Kamal ÁLPEIISOVA,
Qazaqstan Prezıdenti janyndaǵy «Qoǵamdyq kelisim» RMM bas sarapshysy
