Qaırat Kelimbetov Foto ©Iаroslav Radlovskıı, tengrinews.kz
Q.Kelimbetov halyqaralyq ortalyqtyń resmı tili – aǵylshyn tili ári TMD keńistigi elderiniń arasynda aǵylshyndyq quqyq qaǵıdatymen jumys isteıtin tuńǵysh qarjy ınstıtýty ekenin atap ótti. Búginde álemdik qarjy ortalyqtarynyń 90 paıyzy osy aǵylshyn qaǵıdattaryna súıenedi eken. Qazirgi tańda dúnıejúzinde eki negizgi quqyqtyq júıe bar bolsa, onyń biri – konstıtýsııa men zańdardyń baptaryna súıenetin roman-germandyq quqyqtyq júıe, ekinshisi – aǵylshyndyq quqyqtyq qaǵıdaty. Álemniń bıznesmenderi sońǵysyna kóbirek arqa súıeıtin sebebi, brıtan tásilinde táýelsiz sot ár isti adamgershilik-moraldyq turǵysynan qarastyryp, buǵan deıingi sottardyń danalyq sheshimderine, óziniń tájirıbesine, ustanymyna, ishki rýhanı qundylyqtaryna sáıkes sheshim shyǵarady. Bul sheshim óte ádil ári ashyq bolady. Bylaı qarasańyz, aǵylshyndyq sotynyń tabıǵaty qazaqtyń ertedegi bıler sotyna keledi. Mundaı júıemen jumys isteıtin qarjy ınstıtýttaryna kásipkerler nemese ınvestorlar erekshe senimmen qarap, qarjysyn quıatyny da sondyqtan.
«Astana» halyqaralyq qarjy ortalyǵynyń negizgi qurylymdarymen tanystyrǵan Qaırat Nematuly ortalyq quramynda jańa aımaqtyq bırja qurylatynyn, onyń jumysyn jańa qurylym – qarjy qyzmetterin retteý komıteti úılestiretinin jetkizdi. Budan bólek, jyldyń aıaǵyna deıin xalyqaralyq arbıtraj ortalyǵy men táýelsiz qarjy soty qurylady. «Osylaısha, bırja, qarjy qyzmetterin retteýshi, arbıtraj ortalyǵy men qarjy soty – «Astana» ortalyǵynyń basty organdary bolady. Ortalyq naqty alty baǵytqa basymdyq beredi. Olar – kapıtal naryqtaryn damytý, memlekettik aktıvterdi basqarý, jańa qarjy texnologııalaryn damytý, jeke adamdardyń ál-aýqatyn basqarý, ıslamdyq qarjylandyrý men sıfrlandyrýdy damytý», dedi Q.Kelimbetov.
Qymbat TOQTAMURAT,
«Egemen Qazaqstan»
