Aıtalyq, ınvestorlardy yntalandyrý úshin 2065 jyldyń aıaǵyna deıin korporatıvtik jáne jeke tabys salyǵynnan bosatatyn salyqtyq jeńildikter usynylady. Kelesi jyldyń qańtar aıynan Birikken Arab Ámirlikteri, Malaızııa, Sıngapýr, Monako sekildi elderdiń azamattary Qazaqstanǵa 30 kúnge deıin vızasyz kire alady.
Al ortalyqtyń qyzmetkerleri men olardyń otbasylaryna bes jylǵa deıin uzaq merzimdi vızalar beriledi. Sondaı-aq, úzdik tájirıbege saı, qarjy ortalyǵy jeńildetilgen vıza berý rejımin, tirkeýdi, jumysqa alýdy, ózge de qujattyq prosedýralardy «bir tereze» qaǵıdatymen júzege asyrmaq. Buǵan qosa, arnaıy mamandandyrylǵan «AHQO Ekspat ortalyǵyn» qurý josparlanyp otyr. Bul ortalyqqa kóshi-qon, ákimshilik polısııa, memlekettik kirister, halyqqa jáne ınvestorlarǵa qyzmet kórsetý ortalyqtarynyń qyzmetteri toptastyrylyp, sheteldik qyzmetkerlerge bir jerden qyzmet kórsetý tártibi engizilmek.
Sonymen, el ekonomıkasyna paıdasy kóp iri jobalardy júzege asyrǵaly otyrǵan «Astana» halyqaralyq qarjy ortalyǵy 2018 jyldyń qańtar aıynan bastap tolyqqandy qyzmetine kirisedi. Baspasóz máslıhatyna qatysyp, sóz sóılegen qarjy ortalyǵynyń atqarýshy dırektory Saıasat Nurbektiń aıtýynsha, ortalyq óziniń aldynda turǵan mańyzdy mindetterdi kezeń-kezeńimen júzege asyrmaq. Alǵashqy besjyldyqta Ortalyq Azııany qamtıtyn óńirlik ortalyqqa aınalý, odan keıin Eýrazııa keńistigine shyǵý josparlanyp otyr. Sodan keıingi uzaq merzimdi damý strategııasynda ǵalamdyq deńgeıge jetip, álemniń eń úzdiq qarjy habyna aınalý kózdelip otyr.
Al dál qazirgi jaǵdaıda «Astana» qarjy ortalyǵynyń ınfraqurylymdaryn jasaqtaý, ártúrli qurylymdaryn qurý jáne olardy bilikti kadrlarmen qamtamasyz etý úrdisi júrgizilip jatyr.
Qymbat TOQTAMURAT,
«Egemen Qazaqstan»
