Al, aýdan ortalyǵy Ertis aýylyndaǵy №3 jalpy bilim beretin orta mektepke oblys ortalyǵyndaǵy Reseı Sberbank fılıalynyń ókilderi keldi. Bárimizge belgili, bul mektepte Reseı jınaq bankiniń Basqarma tóraǵasy German Gref 70-shi jyldary bilim alǵan. Aýdandaǵy Panfılov aýylynda 1964 jyly týyp, sol jerde erjetken. Áke-sheshesi soǵys kezinde Ertis aýdanyna jer aýdarylǵan. Reseılik tanymal qarjyger ár jyldary qyzmeti asa qaýyrt bolsa da, sáti túskende týǵan aýylyna, ósken jerine kelip te turady. Osydan 6-7 jyldaı buryn ózi oqyǵan mektebiniń 75 jyldyǵyna oraı German Oskarovıch birneshe kompıýter, ınteraktıvti taqta, fotoapparat, beınekamera tartý etken-di.
Bul joly da oblys ortalyǵyndaǵy Reseı jınaq bankiniń ókili Aısulý Qalıeva German Greftiń ystyq sálemin jetkizdi. Sálemdeme «Alaqaı, men 1-shi synypqa baramyn!» sharasyna oraı №3 Ertis orta mektebiniń 1 –shi synybyna oqýǵa kelgen 20-dan asa oqýshyǵa oqý quraldary tartý etildi. Aldaǵy ýaqytta oblystyq bank fılıaly «Mektepke taǵzym» aksııasy boıynsha kómek kórsetýge de nıetti. Balalar qýanyshqa bólenip, estelik sýretterge tústi. Mektep dırektory Sandýǵash Bekjasarovanyń aıtýynsha, qazir mektepte 72 qazaq, 127 orys, 15 ýkraın, 2 belorýs, 17 nemis, 1 azerbaıjan, 7 tatar jáne sheshen, moldavan basqa da ult ókilderiniń balalary orys tilinde bilim alady.
Farıda Byqaı
«Egemen Qazaqstan»
Pavlodar oblysy, Ertis aýdany
