Jańa joba jastardyń shyǵarmashylyq áleýetin, aımaqtaǵy azamattyq qoǵamdy damytý, jas jýrnalısterdiń óz jobalaryn júzege asyrý qabiletin qalyptastyryp, áleýmettik qabiletterin jetildirýdi maqsat etip otyr.
«Joba ómirlerin jýrnalıstıka salasymen baılanystyrýdy qalaıtyn, biraq oǵan múmkindigi joq jastardyń armandaryna jetýine jol ashyp, jýrnalıstıka salasynda qalyptasýǵa kómektesý mindetin kózdeıdi», – dedi A.Danııar.
Jobaǵa qatysýshylar úsh kezeńnen ótedi. Áýeli irikteý kezeńinde úmitkerler ózderiniń esse, foto, aýdıo nemese vıdeo reportajdaryn jiberedi. Jýrnalısterden quralǵan ádilqazylar alqasy úzdik jumystardy irikteıdi. Birinshi synnan súrinbeı ótken jastar, ekinshi kezeńde «Jýrnalıstıka mektebi» dep atalatyn elimizdiń 6 aımaǵynda ótkiziletin 4-kúndik jýrnalıstıka kýrstaryna qatyspaq. Dáristi Sándi Sultan men Gúlnaz Aýdanbaeva sekildi tájirıbeli jýrnalıster oqıdy. Sonyń nátıjesinde qatysýshylar ózderiniń medıa jobalaryn ázirleıdi. Osy úshinshi kezeń nátıjesi boıynsha úzdik avtorlar 100 myń teńge mólsherindegi aqshalaı syılyqpen marapattalady. Jeńimpazdardy marapattaý rásimi aldaǵy jeltoqsanda uıymdastyrylmaq.
«Qazirgi tańda Jýrnalıstıka mektepteri tek úlken qalalarda bar, olardyń kóbisi aqyly. Keıbir jastardyń ondaı mektepterde oqý múmkindigi bolsa, keıbiriniki bola bermeıdi. Bizdiń «Jas Medıa» jobasy bárine birdeı múmkindikter beredi, óıtkeni yqylas pen qalaýdan basqa eshteńeni talap etpeıdi jáne óte tájirıbeli, ári moıyndalǵan tanymal jýrnalısterde oqý múmkindigin syılaıdy», – dep túsindiredi jobanyń maqsatyn A.Danııar.
«Samruk-Kazyna Trust» áleýmettik jobalardy damytý qorynyń atqarýshy dırektory Lıma Dıastyń aıtýy boıynsha, mekeme qazaqstandyqtardyń ómirin jaqsartatyn jobalarǵa kóńil bóledi. Sondyqtan, elimizdiń alty oblysynda ótetin jas jýrnalısterge arnalǵan joba Qor úshin mańyzǵa ıe. Onyń pikirine súıensek, jýrnalıstıka salasyna jańa aıaq basqandarǵa elimizdiń úzdik mamandary dáris oqyp, bilim alýǵa járdemdesedi. Joba «Samuryq-Qazyna» AQ kompanııalar tobynyń «Meniń elim» áleýmettik ınvestısııalar baǵdarlamasy aıasynda júzege asyrylyp otyr.
«Joba aıasynda jýrnalısterdiń praktıkalyq qabilet pen qyzyqty medıa joba jazyp, sheshendik ónerdiń negizderin meńgerýge úıretetin arnaıy baǵdarlama ázirledik. Medıa salasyna kelgen jastar álem moıyndaǵan bedeldi BBC, CNN sekildi arnalardyń deńgeıinde jumys isteýdiń qajettiligin uǵyný kerek. Sonda ǵana aqparattyq kontenttiń sapasy ósedi. Sonymen qatar, jastarǵa jýrnalıstıka mádenıeti men etıkasyn úıretý qajet. Jobanyń jýrnalıstıka salasyn damytyp qana qoımaı, jastar arasynda qoǵamdyq pikir kóshbasshylaryn aıqyndaýǵa kómektesetine senimdimin», – degen tanymal telejúrgizýshi Sándi Sultan óz oıymen bólisti.
Abaı Asankeldiuly,
«Egemen Qazaqstan»
