Baspasóz máslıhatynda Bilim jáne ǵylym mınıstrliginiń Ǵylym komıtetiniń tóraǵasy Bolatbek Ábdirasylov EKSPO kórmesinde kórsetilgen sheteldik ınnovasııalyq jobalar men tehnologııalardy engizý jóninde arnaıy saraptamalyq jumys toby qurylǵanyn jetkizdi. Quramynda ǵylymı-zertteýler ortalyǵy men joǵary oqý oryndarynyń ǵalymdary jáne sarapshylary bar jumys toby jańǵyrmaly energııa, kún, jel, bıoenergetıka salalaryndaǵy jetistikterdi zerttep, keleshek urpaqtyń ıgiligi úshin paıdasy mol jobalardy iriktep, tıisti uıymdarǵa usynbaqshy. B.Ábdirasylovtyń aıtýynsha, bilim salasyna jańalyq ákeletin tehnologııalardy mınıstrlik úsh topqa bólip qarastyryp otyr. Onyń birinshisi – ǵylymı ıdeıalar men kommersııalyq qoljetimdi ınnovasııalar legi bolsa, ekinshisi – bilim tehnologııasy nemese EKSPO muralaryn tıimdi paıdalaný, úshinshisi – osy salaǵa qatysty sońǵy zertteýlerge negizdelgen oqý-ádistemelik quraldar jıyntyǵy.
Jalpy, EKSPO kórmesine 55 ýnıversıtet pen ǵylymı ortalyq ókilderi arnaıy qatysyp, álemde júzege asyrylyp jatqan tájirıbelermen tanysyp qaıtypty. Mamandar sheteldik áriptesterimen 100-den astam kezdesý ótkizgen. Júzdesýler barysynda bilim jáne ǵylym salasynda 9 memorandýmǵa qol qoıylyp, 20-dan astam kelisim jasalǵan. Atap aıtqanda, ál-Farabı atyndaǵy Qazaq ulttyq ýnıversıteti Koreıa, Latvııa ýnıversıtetterimen, L.N.Gýmılev atyndaǵy Eýrazııa ulttyq ýnıversıteti Fransııa, AQSh ókilderimen termoelektr materıaldarynan jasalǵan quraldardy qoldaný jóninde kelisimge kelgen. Sondaı-aq Polsha, Vengrııa, Fınlıandııa, Chehııa elderimen jańǵyrmaly energııa, smart-grıd, 3D-tehnologııalary boıynsha kelissózder júrgizilgen.
Endi Bilim jáne ǵylym mınıstrligi EKSPO alańynda kórsetilgen úzdik ıdeıalyq sheshimderdi tıimdi paıdalanyp, onyń ishinde eń utymdysyn is júzinde qoldanýdy kózdep otyr. Ári bul tehnologııanyń bárin muǵalimderge, oqýshylarǵa keńinen tanystyratyn arnaıy aqparattyq portal iske qosylmaq. Bıyl jyldyń aıaǵyna deıin ashylǵaly otyrǵan saıt keleshekte bilim jáne ǵylym salasyndaǵy ınnovasııalyq jobalardy jurtshylyqqa dáripteıtin tanymdyq aqparattyq alańǵa aınalmaq.
Qymbat TOQTAMURAT,
«Egemen Qazaqstan»
