Jıynda «Áleýmettik medısınalyq saqtandyrý qory» AQ basqarma tóraıymy Elena Bahmýtova «Qorǵa osy ýaqytqa deıin qansha qarjy kelip tústi? Qarjyny kim jáne qaıda saqtaıdy? Qarjy qalaı retteledi?» degen sııaqty halyqty tolǵandyryp kele jatqan ótkir saýaldarǵa naqty jaýap berdi. E.Bahmýtovanyń málimetine qaraǵanda, qazaqstandyqtar 15 qyrkúıekke deıin qorǵa 8 mlrd teńgeden astam qarjy aýdaryp úlgergen. Qor medısınalyq qyzmetti tutynýshylar sany men túsken qarjy týraly ár apta saıyn esep berip otyrady. Qazir saqtandyrylǵan medısına qyzmetin paıdalanýshylar 3,9 mıllıonǵa jetken. Bul kórsetkish mınıstrliktiń aldyn ala jobalaǵan josparymen sáıkes keledi. «Mindetti áleýmettik medısınalyq saqtandyrý týraly» zań boıynsha qor aktıvteriniń saqtalýyna memleket kepildik beredi. Jınalǵan qarjy tek Ulttyq bankte saqtalady jáne osy bank arqyly basqarylady. Olarmen senimdi basqarý týraly kelisim shart jasalǵan», dedi E.Bahmýtova.
Al medısınalyq saqtandyrý qoryna 2018 jyly memlekettik tapsyrys negizinde qyzmet kórsetý jóninde ótinish bergen uıymdardyń jartysyna jýyǵy – jekemenshik klınıkalar. 2018 jyly medısınalyq kómek kórsetýden úmitker densaýlyq saqtaý sýbektileriniń derekqoryna barlyǵy 1519 densaýlyq saqtaý mekemesi ótinish bergen. Onyń 45 paıyzy, ıaǵnı 686-sy – jekemenshik mekeme. Reformany tıimdi júrgizýge baılanysty jasalǵan derekqorǵa medısınalyq kómektiń negizgi kólemin kórsetetin jetkizýshiler de, medısınalyq qyzmettiń jekelegen túrimen aınalysatyn qosalqy densaýlyq uıymdary da engizildi. Derekqor turaqty túrde jańartylyp otyrady.
Azamattardy emdeý mekemelerine tirkeý naýqany – aldaǵy jyldaǵy medısınalyq qyzmetterdi satyp alý úderisiniń zańdy jalǵasy. Turǵyndar bastapqy medısınalyq-sanıtarlyq kómek kórsetetin uıymdarǵa bıylǵy qyrkúıek aıynyń 15-i men qarashanyń 15-i aralyǵynda tirkele alady. Tirkelý kezinde azamattar emhanany erkin tańdaý quqyǵyn paıdalana alady.
Mınıstr E.Birtanov medısınalyq saqtandyrý júıesi engizilgenimen, memleket azamattar aldyndaǵy jaýapkershiliginen bas tartpaıtynyn aıtty. О́ıtkeni Ata Zańda ár azamatqa tegin medısınalyq kómek kórsetý kepildigi berilgen. MÁMS júıesine sáıkes bolmasa da, ár azamatqa tegin medısınalyq kómek berý josparlanǵan. Bul jedel járdem kómegi, ımmýnızasııa jáne qosymsha syrqatyna oraı dıagnostıkalaý men emdeý. Sondaı-aq onkologııa, týberkýlez jáne psıhıatrııalyq syrqatqa shaldyqqan azamattar memleket kómeginen tysqary qalmaıtynyn jetkizdi. MÁMS negizinde saqtandyrylmaǵan turǵyndarǵa eki jylǵa deıin tegin alǵashqy ambýlatorlyq járdem, túrli dıagnostıkalyq kómek jáne dári-dármekpen qamtamasyz etýdi de Úkimet óz mindetine alýdy josparlap otyr. MÁMS-tiń negizgi qarjy kózi jumys berýshi mekemeler men jeke kásipkerler bolǵandyqtan, alǵashqy kezeńniń jumysy tolyǵymen josparǵa sáıkes júrgizilip keledi. Jyl sońyna deıin 25 mlrd teńge saqtandyrý qoryna kelip túsýi tıis. Bul qarjy tek azamattardyń densaýlyǵyn jaqsartýǵa baǵyttalady. E.Birtanov Elbasynyń MÁMS-ti jetildirý máselesine baılanysty bergen tapsyrmalary men talaptaryn oryndaýdy basty mindeti retinde belgilep, júıeniń kemshin tustarymen jumyla jumys istep jatqanyn jetkizdi.
Aıgúl AHANBAIQYZY,
«Egemen Qazaqstan»
ALMATY
