– Komandamyz jas bolsa da, «á» degennen el chempıonaty men kýbok jarystarynda jaqsy qyrynan tanyldy. Bıyl quramnyń teń jartysyna jýyǵy jańalanyp, jastarmen tolyqty. Máselen, «Astana» hokkeı klýbynan 19 jastaǵy shabýylshy Ámir Álibaev qabyldandy. Komanda namysyn saıdyń tasyndaı iriktelgen 28 hokkeıshi qorǵaıtyn bolady. Ilgız Nýrıev, Dmıtrıı Ismagılov, Denıs Stasıýk sekildi tájirıbeli oıynshylarǵa arqa súıeımiz.
Qazaqstan chempıonatynyń 2017-2018 jylǵy maýsymynyń saltanatty ashylý rásiminde aımaq basshysy Qumar Aqsaqalov ekinshi ret el kýbogynyń jeńimpazy atanýymyzben quttyqtap, jeńiske degen senimimizdi jigerlendirdi.
– Desek te, jankúıerler tek jeńis kútip, qansha qoldaǵanmen, kókeılerinde ókinish taby qalǵan sııaqty.
– Kez kelgen jarysty kibirtikteı, qobaljyǵan kóńilmen bastaý zańdy qubylys der edim. Buǵan deıin Rýdnyıdyń «Gornıagynan» 11 ret basym túskenimizben, olar ózindik oıyn órnegi qalyptasqan komanda sanalady. Birinshi kezdesýde 3:1 esebimen utqanymyzben, ekinshi kezdesýde 1:2 esebimen ese jiberip aldyq. Bálkim komandalyq oıyn mashyǵy, jekelegen sheberlikter jetispegen bolar. Onyń ústine komanda kapıtany, halyqaralyq dárejedegi sport sheberi Ilgız Nýrıevtiń aýyr jaraqat alyp, qarymta kezdesýge qatysa almaýy match taǵdyryna áser etken tárizdi. Aldaǵy ýaqytta taktıkalyq turǵydan oılasatyn máseleler joq emes.
– El birinshiligine 2015 jyly tuńǵysh ret qatysyp, alǵashqy oıyndy elordanyń «Nomad» komandasyna qarsy ótkizgenderińiz, onda da ıtjyǵyspen tarasqandaryńyz esimizde...
– Bir utylys, bir utysty aıtyp tursyz ǵoı. Onyń aldynda ǵana Kókshetaý qalasynda elordanyń «Astanasyn», kókshetaýdyń «Arlanyn», Rýdnyıdyń «Gornıak» jáne Qaraǵandynyń «Temirtaý» komandalaryn tize búktirip, «Jeńis kýbogy» maýsymaldy týrnıriniń jeńimpazy atanǵan bolatynbyz. Qazaqstan chempıonatyn kóterińki kóńil-kúımen bastaǵanmen, birden azýly qarsylasqa tap boldyq. Hokkeıshilerimizdiń erekshe tolqyp turǵany baıqaldy. Qansha aıtqanmen, bási joǵary dodada birinshi ret kúsh synasý ońaı emes. Tájirıbeniń azdyǵy bilinip turdy. Degenmen, teń tarqasýymyzdyń ózi nege turady?!
– Alǵashqy kýbokty qanjyǵaǵa baılaǵan kezdegi sátti aıtyńyzshy? Soltústikqazaqstandyq sport súıer qaýym komandany tóbelerine tik kóterip áketkendeı boldy ǵoı?!
– Árıne! О́z tobymyzda ótkizgen tórt oıynda da oza shaýyp, fınaldyq básekede Pavlodardyń «Ertisimen» jolyǵystyq. Match aıaqtalýǵa sanaýly sekýndtar qalǵanda Ilıa Ahmetovtiń soqqan shaıbasy bizge jeńis syılady. Bıylǵy Kýbok jarysynyń sońǵy saıysynda Qazaqstannyń birneshe dúrkin jeńimpazy Atyraýdyń «Beıbarysyn» 3:2 esebimen utyp, ekinshi ret jeńistiń eń bıik tuǵyryna kóterildik.
– Ulttyq birinshiliktiń 2015-2016 maýsymynda qola medaldy jeńip alǵandaryńyzben, bıylǵy týrnır qorytyndysynda tómen syrǵyǵandaryńyzdy qalaı túsindiresiz?
– Pleı-off kezeńinde elimizdiń eki dúrkin jeńimpazy atyraýlyq «Beıbarysqa» ese jiberip, úshinshi orynǵa taban tireýimiz qurylǵanyna áli jyl tola qoımaǵan komandanyń eren erligi dese de jarasady. Al bıylǵy birinshilikti «bestikte» túıindeýimizdiń bar syry tájirıbeli hokkeıshilerdiń oıyndarǵa tolyqqandy qatysa almaýynda. Mysaly, qorǵaýshy Aleksandr Nýrek Dúnıejúzilik Ýnıversıadanyń kúmis júldegeri atandy. Shabýylshylar Ilgız Nýrıev pen Maksım Volkov Azııa oıyndarynan altyn taǵyp oraldy. Bul – aqtalý emes, máseleniń mánisin túsindirý. Quramǵa legıonerlermen qatar qazaqstandyq jáne jergilikti jastar iriktelip alynǵanyn joǵaryda aıttym. Alǵa qoıǵan maqsatymyz bıik. Komandalyq tartymdy oıyn órnegin kórsete otyryp, top jarý. Oǵan qaı jaǵynan bolsyn múmkindigimiz tolyq jetedi.
Áńgimelesken
О́mir ESQALI,
«Egemen Qazaqstan»
Soltústik Qazaqstan oblysy
