Endi osy jobalardyń birqataryn óńirde júzege asyryp, el ıgiligine jaratý kózdelip otyr. Bul jobalar sátimen iske asyrylǵan jaǵdaıda jaqyn jyldarda bizdiń óńirde óndiriletin elektr energııasyn elimizdiń ózge aımaqtary ózindik baǵasymen satyp alýǵa múmkindik týmaq. Osyndaı aýqymdy jobalardyń biri «Energııa beldeýi – ShQ ortalyǵy» dep atalady. Qazirgi ýaqytta atalǵan ortalyqtyń qurylys-montaj jumystary aıaqtalypty. Aımaqta kún energııasyn paıdalaný arqyly júzege asyrylatyn «Jańǵyz Solar» jobasyn iske qosý úshin ıspanııalyq «ARESOL» kompanııasymen birlesken jumystar júrgizilip jatqan kórinedi. Stansanyń boljamdy qýaty – shamamen 35 megavatt. Jýyq arada is-áreket josparyn ázirleý maqsatynda osy kompanııanyń ókilderi oblysymyzǵa kelmek.
Jel energııasy salasyndaǵy qalǵan eki joba da qarqyndy túrde júzege asyrylýda, olardyń qýaty shamamen 62,5 megavatty quraıdy. Qos joba energııa qýatyn 200 megavatqa deıin ulǵaıtýǵa múmkindik bermek. Jospar boıynsha stansalar Jarma aýdanyna ornalasady. Bastamashysy «VEÝ-Shar» JShS bolyp tabylatyn birinshi joba boıynsha barlyq qujattar daıyn. 33 gektar jer telimi bólingen. Jobanyń jalpy somasy – 68 mıllıon dollar. Ekinshi jel elektr stansasynyń quny – 18 mıllıard teńge. Nysandardy iske qosý kelesi jyldyń ekinshi jartysyna josparlanǵan.
Jýrnalısterge arnaıy suhbat bergen oblys ákimi Danıal Ahmetov Shyǵys Qazaqstanda balamaly energııa kózderin damytý boıynsha aýqymdy jumystar qolǵa alynyp jatqandyǵyn jetkizdi. «Energetıkadaǵy basym baǵyttardyń biri – sý energetıkasy. Oblysta bul tarapta da aýqymdy jumystar júrgizilip jatyr. «Turǵysyn GES-1» jobasy qarqyndy iske asyrylyp, bógen salynýda. Bas merdiger – Qytaı memlekettik sý energetıkalyq keshen kompanııasy. Osy keshenniń ekinshi sý stansasyna qatysty aıtar bolsaq, joba memlekettik saraptamadan ótti. Osylaısha, oblysta 5 úlken joba júzege asyrylýda», – deıdi aımaq basshysy.
Jańa energetıkalyq qondyrǵylar Shyǵys Qazaqstanǵa saǵatyna 1 mıllıard kılovattyq energııa tapshylyǵyn jabýǵa múmkindik bermek.
Azamat QASYM,
«Egemen Qazaqstan»
Shyǵys Qazaqstan oblysy
