Aqtóbede respýblıkalyq «Týǵan jer» forýmy ótti

Forýmǵa Parlament depýtat­tary, memlekettik organ­dar­dyń jetekshileri, qoǵam qaı­ratkerleri, belgili ǵalymdar, shyǵarmashylyq zııaly qaýym ókilderi, áıgili sportshylar, álemniń 20 elinde turyp jatqan aqtóbelik jerlester qatysty.

G.Ábdiqalyqova forýmǵa qaty­sý­shylarǵa arnalǵan Nursultan Nazarbaevtyń qut­tyq­taý sózin oqyp berdi. Onda «Rýhanı jańǵyrý» aıasynda júzege asyrylyp jatqan aıryq­sha mańyzdy jobalardyń biri – «Týǵan jer» jobasy ekeni aı­tylǵan. Jalpyulttyq pat­rıotızm qaǵıdattaryna negiz­delgen «Týǵan jer» baǵdar­lama­­sy osyndaı sharalardy júıe­len­dirip, ortaq ıgilikke aınal­dyrýdy kózdeıdi.

«Qazaqstan qasterli Táýelsiz­diginiń úshinshi múshelin zor rýhanı jańǵyrýmen bastady. Meniń baǵdarlamalyq maqalam­nyń aıasynda elimizdiń barlyq aımaqtarynda keń aýqymdy jumystar qolǵa alyndy. «Rýhanı jańǵyrýdyń» negizinde júzege asyrylyp jatqan aıryqsha mańyzdy jobalardyń biri – «Týǵan jer». Árkimniń kindik qany tamǵan týǵan jeri qaıda júrse de júreginiń tórinde. 

Bizdiń árqaısymyz týǵan ólke­mizdi maqtan etemiz, alys júrsek saǵynamyz, qamqorlyq jasaı­myz. Týǵan jerge ińkárlik Týǵan elge súıispenshilikpen ula­sa­dy. Týǵan jerge qamqor­lyq Týǵan elge janashyrlyqpen asta­sady. Jalpyulttyq patrıo­tızm­niń ózegi ispetti «Týǵan jer» baǵ­dar­lamasy osyn­daı izgi nıetter men shara­lar­dy júıe­lep, ortaq ıgilikke aınal­dyrýdy kózdeıdi.

Forýmǵa elimizdiń bar­lyq óńirlerimen qatar, 20 mem­le­ket­te­ turyp jatqan aqtóbelik­ter­diń­ arnaıy kelýi – bizdiń ulttyq biregeıligimizdi, týǵan elge degen shynaıy pat­rıottyq sezimderi­mizdi aı­shyq­­taı túsedi. Búgin Aqtóbe­den bastaý alǵan ıgi shara elimiz­diń basqa óńirlerinde jalǵa­syn tabaryna senimdimin.  Siz­der shynaıy patrıotızm – «Máńgilik Eldiń» myzǵymas tuǵyry ekenin bek túsinip, osynaý patrıottyq sezimdi barsha zamandastaryńyzǵa jetkizý­lerińizdi tileımin! 

Súıikti Qazaqstanymyz gúl­dene bersin! Mereıimiz asyp, birli­gimiz tası bersin! Máńgilik Eldiń kók baıraǵy árqashan asqaq jelbiresin!» – delingen Prezıdenttiń quttyqtaýynda.

Al Memlekettik hatshy óziniń sózin­de saıasat pen ekonomıka­daǵy aýqym­dy ózgeristerdiń ózegi – qoǵam­dyq sanany jedel jetil­­diretin «Rýhanı jańǵyrý» jalpyulttyq joba­sy ekenine toqtalyp ótti. Búgin­de elimizde osy maqsatqa jetý úshin 6 biregeı joba júze­g­e asy­ry­lýda. Sonyń biri – jalpy­ult­tyq patrıo­tızmniń mańyzdy tiregi­­ne aınalǵan «Týǵan jer» baǵdarlamasy.

Jalpy, Fızıka ǵylymynyń zańdy­lyq­taryna súıensek, dóńge­len­gen dúnıede oryn alatyn ár­túr­li tartylys kúshteriniń qa­laı paıda bolatyndyǵy jónin­degi san alýan mysaldarǵa kezi­gemiz. Búgingi orta jáne aǵa býyn urpaq­tyń sanasynda ási­rese jerdiń tar­ty­lys kúshi jó­ninde aıtylǵan de­rek­ter umy­tyl­mastaı saqtalyp qal­ǵanyna da kúmán keltirý qıyn. Jer jer ǵoı. Áıtse de osy jumyr jer­diń betinde týǵan ólke men tý­ǵan topyraqqa degen tartylys kú­shine teń keletin birde-bir qudi­ret-kúsh joq ekenine bás tige alamyz. 

О́z elinde, týǵan topyraǵynda júr­gende adam onyń qadir-qasıetin tereń túsinip, qajetti deńgeıde baǵalaı bil­meýi de múmkin. Árıne bul úshin eshkimdi aıyptaýǵa da, ǵaıbattaýǵa da bol­maıdy, týǵan jerge degen ińkár­lik sezim men perzenttik paryz, ańsaý men saǵynysh odan jyraqqa ket­ken kezde kóbirek kórinis beretini dálel­deýdi qajet etpeıdi. Osynaý zamanda ómirdiń boljaýsyz buralańy men qal­tarystarynda kim qaıda ketpeı jatyr, kimniń qaı elge joly túspeı jatyr? Olardy eń aldymen saǵynysh sezimi týǵan topyraqqa qaraı jetelep, tarta túsetini jaratylystyń jazylmaǵan zańy emeı, nemene?

Osy oraıda elimizdegi irgeli óńir­ler­diń biri Aqtóbeden jan-jaqqa sha­shyrap, tarap ketken jerles­terimiz júzdep, myńdap sanalady. Res­pýblıkamyzdyń aımaqtaryn aıtpa­ǵanda, olardyń berisi keshegi keńestik keńistiktiń aýmaǵynan kelse, árisi álemniń ár shalǵaıynan, Birikken Arab Ámirlikteri men Ulybrıtanııadan, Túrkııa men Mońǵolııadan, AQSh pen Germanııadan, Malaızııa men Ońtústik Ko­reıadan, Egıpet pen Qytaıdan saǵy­nysh jeteginde kelip, týǵan jerdiń topyraǵyna tabandary tıgende kóz jastaryna erik bergenine kýá boldyq.

Árıne munyń úlken máni bar. Sóz­ben aıtyp jetkize almas syry bar. Gáp mynada. Bıyl Aqtóbe oblysynyń qurylǵanyna 85 jyl tolyp otyr. Bul óńirdiń ósip-órkendeýi men damýyn­daǵy aıshyqty asý, bederli beles. Ári munyń ózi Aqtóbe sonaý 1932 jyly respýblıkamyzda qurylǵan eń alǵashqy oblystardyń biri ekenin kór­setedi. Bıylǵy jyldyń basynda osy dara datany «Aqtóbe – qutty me­ken» degen ataýmen atap ótip, oǵan bir kezde osy óńirde týyp-ósip, keıin ártúrli jaǵdaılarmen ózge óńirlerge qonys aýdaryp ketken eldiń eleýli ul-qyzdaryn shaqyrý sharalary belgilengen bolatyn. Sóıtip júrgende 2017 jyldyń 12 sáýirinde baspasóz betterinde respýblıka Prezıdenti Nursultan Nazarbaevtyń rýhanı jańǵyrý jónindegi keń tynysty, kemel oıly maqalasy jarııa­landy. Osy oıly dúnıeni memle­keti­mizdi rý­hanı turǵydan jańǵyrtý­dyń keń aý­qymdy baǵdarlamasy dese de artyq­tyq etpeıdi. Bir sózben aıtqanda, bola­shaqqa baǵdar jónindegi Memleket basshysynyń maqalasy tutas bir asa aýqymdy joba rólin atqara bilgen. 

Osy rýhanı jańǵyrý aıasynda Elbasy óńirlerdegi atqarýshy organ­darǵa «Týǵan jer» baǵdarlamasyn qol­ǵa alýdy tapsyrdy. Mine, osy baǵdar­lama Aqtóbe oblysynda bıylǵy jyl­dyń basynda «Aqtóbe – qutty meken» atty ataýmen belgilengen oblystyń 85 jyldyǵy sheńberindegi aqtóbelik jer­lester forýmynyń máni men mańyzyn odan ári tereńdete tústi. Iаǵnı 2017 jyldyń 12 sáýirinen bas­tap, «Aqtóbe – qutty meken» is-shara­sy múldem jańasha sıpat aldy. Onyń Memleket basshysy belgilep bergen «Týǵan jer» baǵdarlamasymen ún­destigi ári tutastyǵy eskerilip, o bas­taǵy «Aqtóbe – qutty meken» baǵ­dar­­lamasy irgesin keńeıtip, elimizde tuńǵysh ret ótkiziletin «Týǵan jer» respýblıkalyq forýmyna aınaldy. 

Bir sózben aıtqanda, rýhanı jań­ǵyrý jónindegi Prezıdent tujyrym­dary týǵan jerin qasterleı biletin aqtóbe­lik­terge jańa serpin berdi. Budan olar oıyna oı, jigerine jiger qosyp, «Týǵan jer» baǵdarlamasynda qoıyl­ǵan min­detter boıynsha jańa izdenister men talpynystarǵa qulash ura bas­tady. Sóıtip arada taǵy da 4-5 aı ótken kezde munda «Týǵan jer» baǵ­dar­lamasyn iske asyrýdyń barlyq tetikteri iske qosyldy dep senimmen aıta alamyz. Týǵan jerge kósheli kóz­qaras turǵysynan kelip, onyń kórkeıýi men gúldenýine qol soza bilý, bir kún­niń nemese bir aıdyń isi emes, osy oraı­da óńirde búgingi kúni týǵan jerdi tu­ǵyrlandyra túsý jóninde sóz tyıylyp, naqty ister men qadamdar qolǵa alynǵan. Sonymen birge Elbasy bel­gilep bergen «Týǵan jer» baǵdar­lamasy boıynsha bazalyq baǵ­dar­lama baıyptalǵan. Qazir Aqtóbe­de ázir­lengen osy jarqyn jobalar ózge óńir­ler ónege alarlyqtaı deń­geıge jet­keni de talasy joq másele. 

Aqtóbe oblysynyń ákimi Berdibek Saparbaev óziniń sózinde sońǵy jyldary atqarylǵan óńirdegi óreli ózgeristerge toqtala kelip, ekono­mıkalyq ósim jyl saıyn joǵarylap kele jatqanyn atap ótti. «Bul jaǵdaı óz kezeginde áleýmettik máselelerdiń oń sheshilýine de jol ashty. Memleket bas­shysy keleshek urpaqqa jan-jaqty damyǵan qaryshty Qazaqstan qaldyrý kerektigin udaıy uǵyndyryp keledi. Osy uly mindetti iske asyrýǵa úles qosý bárimizdiń ortaq paryzymyz. Buǵan jetýdiń basty qaǵıdatynyń biri týǵan jerge degen súıispenshilik, onyń ósip-órkendeýine qyzmet jasaý. Búgingi forýmdy ótkizýdegi basty maqsatymyz da osy» dep túıindedi óz sózin óńir basshysy. 

Eger naqty derekter keltire ketsek, bıyl óńirde artyq-kemi joq 555 joba iske asyrylyp, oǵan mıllıardtaǵan teńge qarajat jumsalǵan bolsa, osy qomaqty somanyń negizgi salmaǵyn kótergender – óńirge janashyr azamattar, mundaǵy orta jáne iri bıznes ókilderi. Aıtalyq, Aqtóbe qalasy sońǵy jyldary adam tanymastaı ózgerip, munda elimizdiń birde-bir óńirinde kezdespeıtin aıryqsha arhıtektýralyq ansamblder boı túzegen bolsa, buǵan qomaqty qarjy qosqandar da osy eldiń tól perzentteri. Aglomerasııalyq aımaq ortalyǵynda tek bıylǵy jyldyń ózinde shyǵarmashylyq akademııa men óner, oftalmologııa jáne «Meıirim» áleýmettik-beıimdeý ortalyqtary, jekpe-jek jáne muz saraılary, hokkeı modýli, densaýlyq saıajaıy jáne Jubanovtar álemi mýzeı úıi, qalalyq jedel járdem stansasy sekildi tamasha nysandar turǵyzyldy. Oblystyń tarıhı-ólketaný murajaıynyń ǵajaıyp ǵımaraty salyndy. Forým kezinde Aqtóbeniń ajaryn odan ári asha túsken osy qaıtalanbas sáýlet týyndylarynyń el ıgiligine paıdalanylýy úshin qomaqty qarajat aýdarǵan Islambek Saljanov, Vsevolod Shegelskıı, Keńes Raqyshev, Qaırat Maıtekov sekildi óńirdegi mesenat azamattardyń esimderi iltıpatpen ataldy. Olardyń aldy óńirdiń odan ári damýyna mıllıard teńgeden astam qarajat usynsa, sońy 260 mıllıon teńgeni týǵan jerdiń túleýi úshin tólegen. Mundaı jomarttyqtyń arǵy astarynda týǵan jerge degen tereń janashyrlyq pen súıispenshilik sezimi, el men jerge adal qyzmet jasaý ustanymy turǵany talassyz. 

Túıip aıtqanda, Aqtóbede ótki­zilgen «Týǵan jer» forýmynan alar taǵylymnyń biri – óńirde bıznestiń áleýmettik jaýapkershiligin tereń túsine bilgen onyń saıdyń tasyndaı ókilderiniń kóbeıip kele jatqany. Bir kezde jas memleketimiz shaǵyn jáne ortasha bıznestiń órkendeýine barlyq qolaıly jaǵdaılardy týǵyza bilgen bolsa, endi onyń ókilderi sol qamqorlyqqa sáıkes, tıisti qaıtarym bere bastaǵany da Aqtóbe forýmynyń basty oljasynyń biri bolmaq. 

О́sken óńirde halyqaralyq deń­geıdegi «Týǵan jer» forýmyn ótki­zý­degi basty maqsattyń biri ınvestısııa tartý bolǵany da jasyryn emes. Bul turǵyda álemniń 20-dan astam elinen bas qosqan Aqtóbe aımaǵynda kindik qany tamǵandar týyp-ósken jeriniń ósip-órkendeýine óz úlesin qosýǵa ázir ekendikterin aıtqany alqaly jıynnyń taǵy bir oljasy deýge bolady. Eger forýmǵa qatysýshylardyń shamamen 60-70 paıyzy iri bıznes ókilderi, holdıng, ınvestısııalyq qurylymdar men qurylys kompanııalary jetekshileri ekenin eskersek, qutty meken atalǵan Aqtóbege keletin ınvestısııa mólsheri kóbeıe túsetinine shek keltirýge bolmaıdy. Forým sheńberinde olardyń tarapynan balalar baqshasy, mektep, turǵyn úı kesheni, ózge de ınfra­qurylymdyq nysandar men servıstik orta­lyqtar salýǵa nıet pen tilek bildi­rilýi – aldyńǵy pikirimizdiń aıǵaǵy. Sonymen birge forým sheńberinde quny 76 mıllıard teńge quraıtyn 20 memorandýmǵa qol qoıylýy da aıta qalarlyqtaı joǵary nátıje. 

Forým kezinde elge, týyp-ósken jerge tıgizer shapaǵatyn alǵa qaraı ysyra sóılemeı, osynaý júrek pen jan tolqytarlyq kúnge deıin tıgizip úlgergen otandastarymyz da az bolǵan joq. Solardyń biri AQSh-taǵy ortopedııa jáne travma­to­logııa qaýymdastyǵynyń múshesi – Sent Lýıs ýnıversıteti ortope­dııa­lyq gospıtaliniń dırektory Jol­das Quljanov 15 mıllıon dollar­dyń medısınalyq qural-jabdyq­taryn buǵan deıin syıǵa bergenin, bul ıgilikter qazirgi kúni óńir medısı­na­sy­nyń alǵa basýyna septigin tıgizip úlgergenin málimdedi. 

Týǵan jerge degen taǵzym, oǵan degen qurmet tek biryńǵaı qarjy­laı qoldaý kórsetý deńgeıimen ólshen­beıdi. Elge degen janashyrlyq pen aıaly alaqan jylýyn sezdirýdiń san alýan joldary bar. Osy oraıda búginde dúnıeniń tórt buryshynda turyp jatqan aqtóbelik tuǵyrly tulǵalar densaýlyq saqtaý, sport, bilim berý, mádenıet, ónerkásip, aýyl sharýashylyǵy, ındýstrııaly-ınnovasııalyq damý jáne týrızm salalary boıynsha sheberlik sabaqtary men semınarlar ótkizdi. Tegin leksııalar oqydy. Aqysyz otalar jasady. Budan ózge de kól-kósir paıdaly keńester berdi. Sondaı-aq olar kezdesýler men ekskýrsııalardyń bel ortasynan kórinip, týǵan jerge degen syr-sandyqtaryn aqtardy. Bul san alýan is-sharalar úsh kúnge sozylǵan forým qyzmetin mazmun jaǵynan da, túr jaǵynan da baıyta alǵandyǵyn aıtýdyń ózi bir mereı. 

Memleket basshysy Nursultan Nazarbaev belgilep bergen «Týǵan jer» tuńǵysh respýblıkalyq forýmy jóninde taǵy da qandaı oı túıýge bolady? Bul turǵyda halyqaralyq deńgeıdegi basqosý tutastaı elimizdiń áleýmettik mekemelerinde buǵan deıin sheshimin taba almaı júrgen keıbir áleýmettik túıtkilderdiń túıi­nin tarqatyp, onyń kiltin qolǵa usta­ta alýymen qundy boldy dep aıtýǵa tolyq negiz bar. Bul qadam jetim ba­la­lardyń mektepten keıingi taǵdyryna qatysty ońtaıly sheshim qabyldaýdan bastaý alady. Jasyratyny joq, dúnıege kelgennen keıin taǵdyr tálkegine ushyraǵan tastandylar eli­miz­diń áleýmettik oryndarynda tár­bıe­lenip, er jetip, boı jetip, mektepti aıaqtaǵannan keıin qaıda bararyn bil­meı bastaryn taýǵa da, tasqa da soǵady. О́ıtkeni olarǵa buǵan deıingi balalar úıiniń esigi endi qaıtyp ashylmaıdy. 

Sonda olar ne isteýi kerek? Aqtóbe fo­rýmy kezinde osy basy ashyq saýalǵa «Meıirim» atty jastardy áleý­mettik turǵydan beıimdeý orta­lyǵy mysalynda aıqyn jaýap qaıta­ryldy. Áńgimeni qysqa qaıyryp aıt­qanda, ortalyqta jetim balalar men ata-anasynyń qamqorlyǵynsyz qal­ǵan­dar 29 jasqa deıin turyp, eńbek etip, erkelikti kótermeıtin ómirdiń qatań da qatal synyna beıimdele alady. 

«Sábı» qaıyrymdylyq qorynyń qar­jylaı qoldaýy arqyly iske asqan álem elderi arasynda eshqan­­­daı balamasy joq jarqyn joba res­pýb­lıkamyzdaǵy ózge de áleýmettik me­kemelerge sińisti bolsa ıgi. Qazaq­stannan ózge birde-bir elde, birde-bir jerde jetimekterge dál osyndaı sheksiz qamqorlyq jasalmaǵan syńaıly. Mundaı sózben aıtyp jetkize almas izgilik kórinisine forýmǵa qaty­sýshylardyń kópshiligi tań-tamasha qalyp, bastaryn shaıqasty. 

Halyqaralyq deńgeıdegi basqo­sýdyń shoqtyǵyn bıiktetip, órisin ósirgen Q.Jubanov atyndaǵy Aqtóbe óńirlik memlekettik ýnıversıtetinde «Aqtóbe: keshe, búgin jáne erteń» atty taqyrypta keńinen oı-pikir qozǵalǵan konferensııa boldy. Ra­synda Aqtóbe keshe qandaı edi? Búgin qandaı?

ıyrmashylyǵy jer men kókteı. Keshegi Aqtóbe birinen biri aınymaıtyn, biróńkeı surǵylt úıler, ybyrsyp aıqush-uıqysh, bir-birimen tirkesip jatqan kóriksiz kósheler bolsa, búgingi Aqtóbe álemdik deńgeıdegi qala qurylysyna saı jyl saıyn emes, aı saıyn ósip-órkendep, qulashyn keńge jaıyp kele jatqan respýblıkamyzdaǵy sáni men sáýleti kelisken qala. Elimizde balamasy joq kólik-logıstıka ortalyǵy.

Al onyń erteńi she? Sóz joq, A­q­tóbeniń erteńi budan da jarqyn, budan da bıik, ertegidegideı ózgeriske para-par. Aqtóbe Memleket basshysy Nursultan Nazarbaev atap kórset­kendeı, el ekonomıkasyn órge tartýǵa áleýeti jete alatyn qýatty lokomotıv. Elbasymyzdyń Aqtóbe oblysynyń ákimi Berdibek Saparbaevqa óńir ekonomıkasyndaǵy shaǵyn jáne orta bıznestiń úlesin elý paıyzǵa deıin jetkizý jóninde tapsyrma bergeni úlken senim, mol jaýapkershilik. Qazirgi kúni mundaı bıik belesti baǵyndyrý ózge óńirler úshin alynbaıtyn tas qamal ispettes. Bıylǵy jyly aqtóbelikter Elbasy tapsyrmasynyń 50 paıyzdyq mólsherin ıgergeni de eleýli is. Sonymen birge Aqtóbe aglomerasııalyq damý jolyna túsken elimizdegi úsh óńirdiń biri. Soǵan sáıkes óndirisi órken jaıǵan óńirde taıaýdaǵy jyldarda turǵyndar sanyn bir mıllıon úsh júz myńǵa deıin jetkizý belgilengen. Joǵaryda atalǵan konferensııada Aqtóbeniń erteńi jóninde oı-pikir almasqan ǵalymdar men áleýmettanýshylardyń túıini osyǵan toqaılasty. 
Aqtóbedegi rýhanı jańǵyrý aıasyndaǵy halyqaralyq deńgeıdegi basqosý keshe Qobylandy batyr atyndaǵy ortalyq stadıonda ótkizilgen «Týǵan jer» atty respýblıkalyq forýmmen aıaqtaldy. Munda qoıylǵan teatrlandyrylǵan kórinisterdi 13 myńnan astam adam tamashalady. Stadıondaǵy kópshilik kórinister men qoıylymdy ázirlep, álemniń 20-dan astam eliniń ókilderi nazaryna usynýǵa bes myńǵa tarta jastar jáne shyǵarmashylyq pen óner ókilderi qatynasty. Aqtóbeniń arǵy-bergi tarıhynda dál osyndaı deńgeıdegi patrıottyq rýhpen sýarylǵan úlken shara bolǵan emes dep tujyrymdaıdy baıyrǵy turǵyndar.

Osy forým kezinde belgili re­seı­lik jazýshy, Reseıdiń eńbek sińir­gen óner qaıratkeri, Aqtóbe óńirin­de týyp-ósken tulǵa Mır-Haıda­rov Raýl Mırsaıdovıchpen az-kem oı-pikir almasyp qalýdyń sáti tús­ken edi. Týǵan topyraqtan Máskeý­ge qonys aýdarǵannan keıin talaı elge jolym tústi. Talaı jerdiń dámin tat­tym. Talaı eldi araladym. Alaıda týǵan jerin, óz baýyrlarym qazaqtar­daı súıetin, onyń synyq súıem tili­gin qorǵaýǵa dál qazaqtardaı ázir tura­tyn birde-bir eldi, birde-bir jerdi kez­destirip kórmeppin. Sondaı-aq eriksiz túrde bolmasa, óz elinen qonys aýdarýǵa qulqy soǵa qoımaıtyn da – qonaqjaı, qushaǵy kim-kimge de aıqara ashyq darhan kóńil qazaq halqy óz otanyn eshqashan ózgertpeıtin, ony ózgege aıyrbastamaıtyn márt halyq. Olardyń boıyndaǵy osyndaı qasıetter men týǵan jerge degen súıispenshilik sezimderi meniń kishi otanym Aqtóbede ótkizilgen forým kezinde de aıqyn kórindi dep aǵynan jaryldy ol. 

Sondaı-aq G.Ábdiqalyqova memleket-jekemenshik áriptestigi aıasynda salynǵan «Jek­pe-jek sport saraıynyń» ashylý rásimine qatysty. Rásim­nen keıin dzıýdodan Qazaq­stan Respýb­lıkasy Prezı­dentiniń kýbo­gy úshin halyqaralyq týrnır bastaldy.

– Bıyl elimizde úshinshi jań­ǵyrý bastaldy. Onyń bir ba­ǵy­ty rýhanı jańǵyrý bolyp sana­lady. Bizdiń «Rýhanı jańǵy­rý» baǵdarlamamyz ben «jaı­ly jol» dep aýdarylatyn dzıýdo uǵymy ortaq mánge ıe. Ol – sananyń kemeldenýi, – dedi G.Ábdiqalyqova.

Sapary barysynda Memle­kettik hatshy G.Ábdiqalyqova, sondaı-aq «Rýhanı jań­ǵyrý» baǵdarlamasyn júze­ge asyrý aıasynda salynǵan áleýmet­tik-mádenı nysandardy aralap kórdi.

Temir QUSAIYN,
«Egemen Qazaqstan»

AQTО́BE