Erte kóktemnen kúnge shaǵylysqan aımańdaı ketpenin alyp, atyzdan shyqpaǵan dıqandardyń qaǵanaǵy qarq, saǵanaǵy sarq, kóńili toq. О́ıtkeni maqta baǵasy kóńilge qonymdy. Maqta qabyldaý beketteri ár tonnany 165 myń teńgeden qabyldaı bastady. Eńbek aqtaldy degen osy. Ala jaz boıy alashapqyn bolǵan qońyr kúz ár shańyraqtyń berekesin kirgizip-aq jatyr.
Sonaý jyldary kúlmek túgili kóz jasy kól bolǵan ýaqyttar da bolǵan. «Bulaqtyń basyndaǵylar bal ishedi, sońyndaǵylar ý ishedi» degen qanatty sóz osy maqta ekken dıqandardan qalǵan. Aptap tóbeni tesip, ala qarǵanyń mıy aınalyp tyrań etip ár jerge qulap jatqanda kóni kepken maqtalyǵyna sý jetkize almaı shermende bolǵan dıqandardyń sý kezegi úshin ketpendesip qala jazdaǵanyn talaı kórgenbiz. О́zbekstannan keletin «Dostyq» kanalynyń qazaqqa kelgende sýy tartylyp, memleketaralyq kelisimsharttaǵy kólemi az beriletin ýaqyt ótti. Shilińgir shildede atyzdar qýrap qalmas úshin Shardarada sý qoımasynyń saǵasynan elektr qýatymen jumys isteıtin sý sorǵy stansasy iske qosylǵan. Memleketke qyrýar qarjyǵa tússe de, amalsyz barǵan qadam edi.
Búginde memleketaralyq kelisimderdiń negizinde О́zbekstannyń peıili jaqsardy. Sý jetkilikti. Sý mol bolǵan soń dıqandar da oıdaǵydaı ónim aldy. Kezinde Maqtaaral aýdanynyń ákimi bolǵan, búginde aýyl sharýashylyǵy basqarmasynyń basshysy, bilimdi Máskeýdegi Tımırıazov ýnıversıtetinen alǵan Serik Turbekovtiń bastamasymen dıqandar atyzdy tereń qopsytý ádisine ótken. Soqamen jerdiń qabatyn aıra-jaıra qylmaı ylǵal men topyraqtyń qunaryn saqtaýǵa septesetin jańa tehnologııanyń arqasynda 95 myń gektar jerge egilgen shıtti maqtadan gektaryna 21-24 sentnerden ónim alýǵa múmkindik bar.
Jalpy, bıyl Ońtústik Qazaqstanda 134,6 myń gektar jerge maqta shıti sebilgen. Bul ótken jylmen salystyrǵanda 25 myń gektarǵa artyq. 2016 jyly sharýalar ár gektaryna ortasha eseppen 26,2 sentnerden ónim alyp, barlyǵy 286,4 myń tonna maqta jınaǵan. Búginde egis kóleminiń artýyna baılanysty óńirde 300 myń tonnadan astam maqta jınalady dep josparlanyp otyr.
Baqtııar TAIJAN,
«Egemen Qazaqstan»
Ońtústik Qazaqstan oblysy
