Almatydaǵy «Ǵylym ordasynyń» kishi zalynda Sh.Ýálıhanov atyndaǵy Tarıh jáne etnologııa ınstıtýtynyń uıymdastyrýymen QR Prezıdenti N.Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasyna oraı jáne latyn álipbıine kóshý jónindegi prezıdenttik ıdeıany qoldaý maqsatynda «Qazaqstanda latyn álipbıiniń engizilýi: ulttyq biregeılik pen rýhanı jańǵyrýdyń negizi» taqyrybynda dóńgelek ústel májilisi ótti.
«Ǵylym ordasy» MQK jáne ál-Farabı atyndaǵy QazUÝ-diń Tarıh, arheologııa jáne etnologııa fakýltetiniń qoldaýymen ótkizilgen atalmysh basqosýda tanymal ǵalymdar, UǴA akademıkteri S.Qırabaev, Ý.Qalıjan, Prezıdent arhıviniń dırektory, tehnıka ǵylymdarynyń doktory B.Japarov jáne basqa da ǵylymı qaýymdastyq ókilderi, ǵylymı-zertteý ınstıtýttarynyń ǵalymdary, magıstranttary men doktoranttary qatysty.
Sh.Ýálıhanov atyndaǵy Tarıh jáne etnologııa ınstıtýtynyń dırektory, professor Zııabek Qabyldınov óz sózinde «Elbasy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasynda Qazaqstannyń álemdegi eń damyǵan 30 eldiń qataryna qosylý úshin aldaǵy ýaqytta qolǵa alatyn mindetterdi de saralap berdi. Olardyń arasynda taıaý jyldary júzege asyrýǵa kirisetin naq jobalardyń arasynda – qazaq jazýyn latyn árpine kóshirý máselesi de bar. Elbasymyz «Latynshaǵa kóshýdiń tereń logıkasy bar. Bul qazirgi zamanǵy tehnologııalyq ortanyń, kommýnıkasııanyń, sondaı-aq HHI ǵasyrdaǵy ǵylymı jáne bilim berý prosesiniń erekshelikterine baılanysty», dep kórsete kele, qazaq álipbıiniń jańa grafıkadaǵy biryńǵaı standartty nusqasyn qabyldaý, eki jyl merzim aralyǵynda osy máselege qatysty uıymdastyrý jáne ádistemelik jumystar júrgizýdi júktegen edi. Sondyqtan elimizdiń rýhanı jańǵyrýynyń negizi bolyp tabylatyn latyn álipbıine qatysty halyq arasynda keńinen túsindirý jumystaryn júrgizip, qoldaý bildirý qaı-qaısymyzdyń da paryzymyz», ekenin atap ótti.
Jıynǵa qatysýshylar jahandaný úrdisindegi latyn álipbıiniń qoldanys aıasynyń mańyzy, latyn álipbıine kóshý jáne ony engizý joldary, tarıhı tamyrlary men álemdik tájirıbesi, latyn álipbıiniń múmkindikteri men bolashaǵy týrasyndaǵy máselelerdi talqylaı otyryp, latynǵa kóshý jónindegi prezıdenttik bastamaǵa tolyqtaı qoldaý kórsetetinderin jetkizdi, sondaı-aq jańa álipbıde paıdalanylatyn áripterdi durys tańdaý jónindegi óz usynystary men tilekterin ortaǵa saldy.
Dóńgelek ústel aıasynda Prezıdent arhıvi 1928-1940 jyldardaǵy qundy tarıhı qujattar kórmesin, «Ǵylym ordasynyń» ortalyq ǵylymı kitaphanasy latyn qarpindegi sırek kitaptar kórmesin uıymdastyrdy.
Mıra Baıbek,
"Egemen Qazaqstan"
ALMATY
