Aqtóbe qalasynda Qazaqstan halqy Assambleıasy ǵımaratynda «Rýhanı kelisim – tatýlyq tiregi» atty taqyrybynda ótkizilgen dóńgelek ústel májilisi osy máselege arnaldy. Munda birinshi bolyp sóz alǵan «Nur ǵasym» meshitiniń naıb ımamy Asylhan Temirhanov ıslamnyń basty ustanymy dinaralyq tatýlyqqa negizdelgenin naqty paıymdaýlar boıynsha baıandap berdi. Sonymen birge ol konfessııaaralyq qarym-qatynastardy tereńdete túsýde ıslam dininiń izgilik pen qaıyrymdylyqqa toly qadamdaryn júrekterge jetkize aıtty.
О́ńirde rýhanı qundylyqtardy qaster tutýdyń san-alýan túrleri men ádisteri júzege asyrylyp keledi. Bul jóninde óńirde qurylǵan «Rýhanııat» mýzeıiniń ǵylymı qyzmetkeri Aızagúl Jambylova aıtyp berdi. Bizdiń murajaıdyń basty qyzmeti – dinderdi nasıhattaýǵa emes, álemdik jáne dástúrli dinderdiń paıda bolýyn taldaýǵa jáne damý tarıhyn jınaqtaýǵa negizdelgen. Mundaǵy muraǵattarda kóp syr bar. Túpteı kelgende qaı din qandaı konfessııa bolmasyn olardyń kózdeıtin maqsattary – jaqsylyqqa úndeý, qııanattan boıdy aýlaq salýǵa shaqyrý. Bizdiń murajaıǵa qoıylǵan ekspozısııalardan osy máselege qatysty aıǵaq dúnıeler de molynan tabylady dedi budan ári sarapshy maman.
Sondaı-aq dóńgelek ústelde Q.Jubanov atyndaǵy Aqtóbe óńirliń memlekettik ýnıversıtetiniń ǵalymdary Dmıtrıı Masıýk pen Sabyrjan Muhtarovtar Qazaqstan – konfessııaaralyq kelisim araly atanǵanyn aıta kelip dinı turǵydaǵy tolleranttylyq jas memlekettegi basty rýhanı qundylyqtardyń birine aınalǵanyn atap kórsetti. Rýhanı kelisimniń taǵy bir tutqasy – til. Osy turǵyda qazaq tili Qazaqstan halqyn biriktirýshi til rólin atqarýy tıis delindi budan ári.
Dóńgelek ústel májilisin Qazaqstan halqy Assambleıasy Aqtóbe oblystyq hatshylyǵy meńgerýshisi Nurbaqyt Barbosynov qorytyndylady.
Temir QUSAIYN,
«Egemen Qazaqstan»
