Aıta ketetin jaıt, M.Qazbekovadan 2 aptadan keıin Úkimet basshysyna saýal joldaǵan depýtat Danııa Espaeva da «Týrıstik qamqor» qorynyń paıdasyzdyǵyn qosymsha faktilermen dáleldeı túsken. «Búgin túnde «Aq jol» partııasy fraksııasynyń depýtattaryna qaıǵyly jaǵdaıǵa tap bolǵan Taldyqorǵan jáne Almaty qalalarynyń jeti qazaqstandyq týrısteri habarlasty. 21 qyrkúıekte Kemer qalasynda oryn alǵan jol kólik oqıǵasynan Túrkııanyń 4 azamaty qaza tapty, al qazaqstandyqtar aýyr jaraqattar alyp, olarǵa shuǵyl túrde aýyr otalar jasaldy. Qazaqtyń jas jigitteri men qyzdary elge tek jatqan qalpynda tasymaldana alady, al oǵan qomaqty qarajat qajet.
Alaıda olardyń «Týrıstik qamqor» qoryna, «Eır Astana» avıakompanııasyna jáne basqa da organdarǵa úndeýleri nátıjesiz qaldy. Qazir zardap shekkenderge járdemdesýmen SIM-niń Antalııadaǵy bas konsýly Baýyrjan Abdrahmanov qana aınalysyp jatyr, biraq onyń múmkindikteri shekteýli. Eki kún buryn fraksııa depýtattarymen kezdesýi barysynda «Týrıstik qamqor» qorynyń basshylyǵy «bizdiń jalǵyz mindetimiz – azamattarymyzdy qaıtarý», dep sendirdi. Nelikten qazir olar áreketsiz otyr? Biz Úkimetten baǵynyshty uıymnyń áreketsizdigine aralasýdy surap, azamattarymyzdyń qaıtyp oralýyna shuǵyl kómek kórsetýdi, sonymen birge olardy qajetti medısınalyq jáne uıymdastyrýshylyq kómekpen qamtamasyz etýdi talap etemiz» delingen onyń saýalynda.
Osy saýaldarǵa Premer-Mınıstr Keńsesiniń basshysy N.Aldabergenov qol qoıǵan tómendegideı jaýap keldi:
«Sizderdiń Qazaqstan Respýblıkasy azamattarynyń shyǵý týrızmi salasynda quqyqtaryna kepildik berý júıesiniń keıbir máselelerine qatysty depýtattyq saýaldaryńyz múddeli memlekettik organdardyń qosymsha pysyqtaýyn jáne jan-jaqty qaraýyn talap etedi. Osyǵan baılanysty, atalǵan másele boıynsha Úkimet tarapynan jaýap keıinirek beriletinin habarlaımyn».
Árıne, Úkimet ózi qurǵan qordy ózi dereý jaýyp tastamaı, ol úshin jan-jaqty zerttelip, qordyń tıimsizdigine shynymen kóz jetkende ǵana sheshim qabyldanatyn shyǵar. Al onyń búgingi tańdaǵy isiniń shalalyǵy – jeke basshylarynyń óz mindetin durys atqarmaǵandyǵynda da bolýy múmkin ǵoı. Áıtpese qordy qurǵandaǵy maqsat – shetelge týrıstik saparǵa shyǵatyn azamattarymyzǵa qamqorlyq jasaý nıetinen týǵany anyq.
Ázirlegen
Jaqsybaı SAMRAT,
«Egemen Qazaqstan»
