«Qazaqstan Úkimeti qyrǵyzstandyq taraptyń bes túbegeıli baǵyt boıynsha syndarly ustanymyna úmit artady. Birinshi: salyqtyq ákimshiliktendirý boıynsha Qyrǵyzstan ulttyq zańnamasynyń normalaryn EAEO quqyǵymen sáıkestendirý. Ekinshi: zańsyz eksportqa, onyń ishinde kontrafaktilik ónimderdiń eksportyna qarsy is-qımyl», - dedi Premer-Mınıstr Tashkentte ótken TMD Úkimet basshylary keńesiniń otyrysynda qazaqstandyq-qyrǵyzstandyq shekara aýmaǵyndaǵy baqylaý máseleleri jóninde.
«Úshinshiden: EAEO talaptaryn saqtaý úshin qyrǵyz tarapynyń taýarlardy turaqty jáne tıimdi veterınarlyq-sanıtarlyq jáne fıtosanıtarlyq (karantındik) baqylaýmen qamtamasyz etýi. Tórtinshi: Qyrǵyzstannyń ekonomıkalyq odaqqa múshe elderdiń kóliktik zańnamasyn buzýdyń aldyn alý jáne eskertý boıynsha shara qabyldaýy.
Besinshi: kontrabanda men qazaq-qyrǵyz shekarasy arqyly esirtki zattaryn, qarý-jaraq, oq-dári jáne ózge de tyıym salynǵan zattardy zańsyz tasymaldaýǵa jol bermeý. Osylaısha, biz ózimizdiń ulttyq múddelerimizdi ǵana emes, EAEO keńistiginiń ekonomıkalyq múddeleri men ekonomıkalyq qaýipsizdigin qorǵaýdamyz», - dep tolyqtyrdy ol óz sózin.
Baqytjan Saǵyntaevtyń aıtýynsha, Qazaqstan men Qyrǵyzstan shekarasynda EAEO zańnamasynyń normalary men talaptaryna tolyq sáıkes keletin tekserý men baqylaý rettiligi ornaǵan.
«Biz ekijaqty ekonomıkalyq yntymaqtastyq pen shekaralyq, kóliktik, fıtosanıtarlyq jáne veterınarlyq baqylaý, kedendik jáne salyqtyq ákimshiliktendirýdegi ózara árekettestik máseleleri boıynsha syndarly dıalogqa daıynbyz. Aldaǵy ýaqytta da qyrǵyzstandyq áriptesterge EAEO quqyǵy men normalaryna beıimdelýge kómek kórsetýge ázirmiz», - dep atap ótti Baqytjan Saǵyntaev.
