«Jetisýmen» egiz qozydaı qatar kele jatqan «Ognı Alataý» gazeti de ǵasyr toıyn toılaýǵa ázirlenip júr. Qaıda barsa da juby jazylmaı qatar qonatyn, redaksııasy ylǵı da kórshi ornalasatyn eki basylym osy aptada 500 mıllıonynshy danasyn jarysa jaryqqa shyǵardy. Osyǵan oraı óńirlik kommýnıkasııalar qyzmetinde kezekti brıfıng ótti.
Eki gazet te búginderi «О́lke tynysy» jaýapkershiligi shekteýli seriktestigine qaraıdy. Basqosýdyń alǵashqy sózin «О́lke tynysynyń» dırektory Meıram Janádilov aldy.
– Qos basylym aldaǵy jyly ǵasyrlyq toıyn toılaıdy. Ony tarıhı oqıǵa dep eseptesek, 500 mıllıonynshy danasyn oqyrmanǵa joldaýdyń ózi de aıtýly sát emes pe? Bul – bizderdiń peshenemizge jazylǵan baqyt. Osy mereıtoıǵa baılanysty Jýrnalıster úıi men «Jastar» sport kesheni arasynda jýrnalıster alleıasyn ashý kózdelip otyr, – dedi seriktestik basshysy.
Halyqaralyq «Alash» ádebı syılyǵynyń ıegeri, oblystyq «Jetisý» gazetiniń bas redaktory Ámire Árin óz kezeginde:
– Bizdiń gazettiń bastaýy 1918 jyldyń 21 maýsymynan bastalady. Aqpan tóńkerisinen keıin el ishinde dúrbeleń bastalyp, alashapqyn shaq ornady. Dál sol kezeńderde bolshevıkter tez arada ózderiniń úkimin, nasıhatyn júrgizý úshin «Jetisý isshi halyq muqbyry» gazetin ashty. Bul gazet shyn máninde halyqtyń quqyǵyn qorǵady, – dep basylymnyń tarıhyna toqtaldy. Jáne 100 jyldyq mereıtoı barysynda uıymdastyrylatyn is-sharalar jaıyn sóz etti. – Shyn máninde bul bizdiń jáne oblys ákimi Amandyq Batalovtyń peshenesine jazylǵan baq. Tarıhı toıdan kúterimiz kóp. Gazettiń tarıhy, estelikter men qyzmet etken qalamgerlerdiń shyǵarmashylyǵy toptastyrylǵan «Ǵasyr ǵumyr» atty kitap shyǵarý eń birinshi kezekte tur. Oǵan qosa «100 jylǵa – 100 shara» aıdarymen 100 ıgi shara uıymdastyramyz. Osy oraıda aıta ketý kerek, ujym 2-3 jyldyń ishinde jalyndy jastarmen tolyqty. Biz jastardy ata basylymda jemisti qyzmet etýi úshin baspanamen qamtýdy oılastyrýdamyz. Muny oblys ákimi Amandyq Ǵabbasulynyń da quptary anyq. Ǵasyrlyq toı qarsańynda eki gazet 20 páterdiń kiltine ıe bolady dep úmittenemiz.
«Ognı Alataý» gazetiniń bas redaktory Atsalım Idıgov:
– Osy ýaqytqa deıin 42 redaktor basshylyq etken, ár jyldary túrli ataýmen oqyrmanǵa jol tartqan gazet 1964 jyldan bastap «Ognı Alataý» ataýyna ıe boldy. Basylym orys tilinde jaryq kórgenimen, atamura men ulttyq qundylyqtardy qunttap, salt-dástúrdi nasıhattap, memlekettik tildiń mártebesin asqaqtatýda jemisti eńbek etip kele jatyr. О́z basym basshy retinde jýrnalıstiń qos tildi jetik bilgenin jón kóremin, – deıdi.
Bir zamandarda aptasyna 5 ret shyǵyp turǵan, táýelsizdik jyldarynan beri aptasyna 3 márte elge jol tartatyn gazetterdiń taralymy 200 myńǵa deıin jetken kezi bolypty. Mundaı gazettiń tarıhy da osal bolmasa kerek. Ázirge daıyndyq esebinde, 100 jyldyqtyń toqymqaǵary retinde uıymdastyrylǵan sharanyń basty sebebi – joǵaryda aıtqan ataýly nómirdiń jaryqqa shyǵýy. Basqosý sońynda gazettiń 500 mıllıonynshy danasyna basylym basshylary qoltańba qoıyp, jıylǵan jurtqa úlestirdi.
Almas NÚSIP,
«Egemen Qazaqstan»
Almaty oblysy
